yastığa qoyub özümü yuxunun qollarına buraxdım.
* * *
Yatıb qaldığım üçün oyanan kimi əlim ayağım bir-birinə dolaşmışdı. Üstünə birdə Səndər zəng etmiş, on dəqiqəyə çatacaqlarını xəbər verincə lap başımı itirmişdim. Bir tərəfdən əynimi geyinir, bir tərəfdən evi səliqəyə salmağa çalışırdım. Mətbəxdən gələn qəhvədanın cingiltili qaynama səsi ilə əlimdəki adyalı kənara atıb otaqdan çıxacağım zaman ayağım qapının küncünə ilişdi. Ağzımdan qaçan çığırtı ilə ayağımı qaldırıb ağrıya görə yerimdəcə tullanmağa başladım. Zibilə qalasan! Bir bu çatmırdı! Bir təhər axsayaraq mətbəxə gəlib çıxmışdım. Qazı söndürüb yenidən hazırlaşmağa davam etdim.
Ah, sonda hazır idim. Çantamı əlimə alıb otaqdan çıxdım. Səndər gəldiklərini xəbər verən sms atmışdı. Cəld ayaqqabılarımı geyinib evdən çıxdım.
Mənzildən çıxınca qəribə üşümə ələ aldı bədənimi. Günəş təpədə olsa da qışın soyuğu hələ də meydanda idi. Qapıdakı mühafizəçilərə salam verib üzərimdəki gödəkçəyə sarılaraq həyətin girəcəyində dayanan boz rəngli avtomobilə yaxınlaşdım.
Arxa qapını açıb yerimi rahatladım. Səndər sükan arxasında, Ayaz onun yanında əyləşmişdi.
"Salam, gözəllik" - dedi Səndər bütün səmimiyyəti ilə. Üzündə geniş gülümsəmə var idi.
"Salam" - dedim nisbətən alçaq tonda. Ayaz isə həmişəki kimi səssiz idi. Təbii, ondan olsa avtomobili özü idarə edib bizsiz gedərdi fizoterapiyaya.
Avtomobil hərəkətə gələn kimi - "Kəməri tax" - dedi Ayaz quru səslə. İstəmsizcə gülümsədim. Nə qədər soyuq davransa belə məni düşünürdü. Nəyi inkar etsə də bunu əsla edə bilməz.
Səndərin zarafatları ilə keçən bir saatlıq yoldan sonra, sonda gəlib çatmışdıq. Cəld avtomobildən enib Səndərlə birlikdə Ayaza kömək etmək üçün onun tərəfinə keçdik. Əvvəlcə sağ ayağını aşağı endirdi sonra həmin ayaqdan dəstək alaraq sol ayağını da qaldırıb asfalt döşəməyə qoydu. Başı dönüb yıxılmasın deyə qoluna girmək istəyincə 'uzaq dur' deyə atdığı sərt baxışının altında geri çəkilməli oldum. Zibilə qalasan! Yenə eyni şeyi edirdi!
Səndər