Əfsanə və nağıllarda div, cin və əcinnələr bir adamın harada olduğunu, nə iş gördüyünü və ümumiyyətlə, istənilən məlumatı öyrənməkdən ötrü ovcunun içini iyləyir və bu zaman guya arzu etdiyi suala cavab alırlar. Ovuc içi iyləmək yolu ilə adamların taleyini əvvəlcədən müəyyən etməyin mümkün olması haqqında da müxtəlif əfsanələr vardır və bunlar hamısı ibtidai insanların sehr, cadu, fala inanmaları ilə, obyektiv aləm haqqındakı məlumatlarının azlığı ilə əlaqədardır. “Ovcumun içini iyləməmişəm ki!” ifadəsi “mənə bu barədə heç kəs bir söz deməyib”, “mən bu hadisədən heç cür xəbər tuta bilməzdim” mənasında işlədilir.