(Lirik-psixoloji)

Buddha təbəssümü: kədərin gülüş halı. İztirabların boyalarıyla rənglənən sevinc akvarelləri.Qəmgin baxışların təbəssüm ritmli valsı.

Gülümsəyərsən, bütün dərdlərinin, kədərlərinin sənə pislik edənlərin, səni anlamadan məhv edib gedib tək qoyanların, arzularını əlindən alanların, hər kəsin üzünə gülümsəyərsən. Bir uşaq gördüyündə sarılmaq, onun yerində olmaq istəyərsən.

Gülərsən uşaqların, heyvanların saf baxışlarında cənnəti taparaq gülümsəyərsən. Ağacların, yarpaqların, qumların daşların ruhsuz cisimlərinə ruh bəxş edər təbəssümün. İnsanlıq və dünya önündə bir səcdə olar gülümsəmən.

Əzabların bir həddə çatar, limiti keçər və sən onları məmnunluqla qarşılayaraq, bir məsum gülümsəmə ilə qonaq edərsən ruhuna.

Güclüsənmi, bəlkə də güclü görünərsən və bu görüntün səni gülümsətməz, içdən-içə hıçqırıqlarla, iztirabların ağır yaşlarıyla güldürər, qəhqəhələr çəkdirərək güldürər, elə gülərsən ki, hətta güldüyünü unudar və özün də bir gülüşə çevrilərək dodaqlarından uçub gedərsən...