Yenə qılıncını çəkdi üstümə,
Qurbanı olduğum o ala gözlır.
Yenə cəllad olub durdu qəsdimə,
Qələm qaş altında piyala gözlər.

Başımdan getmişdi sevdanın qəmi,
Xəyalım gəzirdi bütün aləmi,
Bu dustaq könlümü. deyin, yenəmi
Çəkdiniz sorğuya, suala gözlər?

Mənim sevgilimdir o gözəl pəri,
Qoy üzə vurmasın keçən günləri,
Mən qədir bilənəm əzəldən bəri,
Sizinlə yetmişəm kamala gözlər.

Cahanda hər hökmü bir zaman verir,
Dünən dövran sürən bu gün can verir.
İllər xəstəsiyəm, yaram qan verir,
Siz məni saldınız bu hala, gözlər