Bizim o şərtlə yeddi saatımız ola bilər ki, mən axşamqabağı bir az yata
bilim, yoxsa sənin qarşında, olsa-olsa, yazıq və xəstə bir vəhşi olacaqdır.
2-ci imkan, cədvələ əsasən, çox əladır:
4.12-də buradan çıxıram və artıq (artıq! artıq!) 7.28-də Qmyundda oluram.
Hətta mən bazar günü sürət qatarı ilə gəlsəm belə, oraya 10.46-da çatardım, bizim
on beş saatımız olacaqdır ki, bir neçə saat yatmaq olar. Amma işlər daha yaxşı
olacaq. Mən heç də mütləq bu qatarla getməli olmayacağam, çünki 4.38-də
günortaüstü Praqa sərnişin qatarı gedir, elə onunla da gedə bilərəm. Onda
bizim iyirmi bir saat birgə vaxtımız olur və biz (sən bir fikirləş!) nəzəri cəhətdən, bu
imkandan hər həftə istifadə edə bilərik.
Burada təkcə bir sıxıntı vardır, amma fikrimcə, o qədər də ciddi deyildir, hər
halda, sən arayış məsələsini qaydaya salmalısan. İş bundadır ki, Qmyund vağzalı
Çexiyanındır, şəhər isə Avstriyanın; pasportdakı hər hansı axmaq bir problem ona
gətirib çıxarır ki, Vyana sakinləri pasportsuz çex vağzalından keçə bilməzlər? Axı
onda Vyanaya gedən Qmyundlular da çex vizası olan pasport almalıdırlar, yox, mən
buna heç cür inana bilmirəm, bu elə bil ki, lap bizim acığımıza bu cürdür. Və
bundan əlavə, bir pis şey də odur ki, mən tam bir saat Qmyund gömrükxanasında
gözləməliyəm, sonra isə vağzaldan çıxmalıyam, bu isə bizim iyirmi bir saatımızı
azaldır.
Onu deməliyəm ki, bu cür vacib şeylərdən sonra heç bir əlavə edə bilmərəm.
Öz aramızdır, məni bu gün məktubsuz qoymadığın üçün sənə “sağ ol” düşür. Bəs
sabah? Telefonla zəng etməyəcəyəm: əvvəla, həddən artıq həyəcanlı oluram,
ikincisi, bu, sadəcə, mümkün deyil (artıq mən bilmişəm), üçüncüsü də, biz tezliklə
görüşəcəyik. Təəssüf ki, Ottlın indiki vaxtda imkan tapıb pasport üçün polis
idarəsinə getmək imkanı yoxdur, sabah gedəcəkdir. Bəli, sən markalarla bağlı əla
hərəkət eləmisən (təcili poçtla bu markaları neyləmişəmsə, ona bu barədə
danışanda az qalmışdı ki, ağlasın). Sən mənə markalara görə kifayət qədər