Bəzi hədislərdə başqasından nə isə istəmək ciddi məzəmmət olunub. Həmçinin, deyirlər ki, ehtiyacları yalnız Allahdan istəmək lazımdır. Başqasından heç nə istəmək olmazmı?
Əvvəla, müsəlman hər şeyin ona Allah tərəfindən (ya birbaşa, ya da müəyyən vasitələrlə) verildiyinə inanmalı və nemət verməkdə heç kimi Allaha şərik qoşmamalıdır. İkincisi, Allah öz bəndələrinə nemətləri bəzən birbaşa, bəzən də müəyyən vasitələrlə bəxş edir. Məsələn, bir adamın ruzisini başqasının əli ilə yetirir. Bu da Allahın qoyduğu bir qaydadır və bunu normal qarşılamaq lazımdır. Əgər dünyada müdir-işçi, rəhbər-tabeçi münasibətləri olmasaydı, həyat davam etməzdi. Nəhayət, üçüncüsü, hədislərdə məzəmmət olunan istəmək imkanı ola-ola başqasına minnət etmək, başqasının boynuna yük olmaq mənasını verir. Yəni bir nəfər özü işləyib ruzi qazanmaq imkanına malikdirsə, özünü yalandan ehtiyaclı və zəif kimi göstərib özgəsindən nə isə ummamalıdır. Amma yardıma həqiqətən ehtiyacı olanlar öz ehtiyacları miqdarında kömək istəyə bilərlər və bunda günah yoxdur.