BƏZİ ÖLKƏLƏRDƏ SATIŞDAN YIĞIŞDIRILAN "STRESS ÇARXLARI " BAKININ MAĞAZALARINDA.
Son bir neçə ayın ən məşhur oyuncağı olan "stress çarxı" bəzi ölkələrdə qadağan olunsa da, Azərbaycanda getdikcə daha çox yayılmağa başlayır. Uşaqların diqqətinin dağılmasına səbəb olduğuna görə ABŞ-ın bir neçə ştatında, Böyük Britaniya və Ərəb Əmirliyində satışdan yığışdırılan oyuncaq Bakının demək olar ki, bütün bazar və ticarət mərkəzlərini bəzəyir. Materialından və dizaynından asılı olaraq 5-7 manata satılan çarxlarla yanaşı satışda daha bahalı, hətta qızıldan hazırlanan "stress çarxları" da mövcuddur.
Virtual.aza istinadən xəbər verilir ki, daha çox məktəblilərin diqqətini çəkən bu oyuncağın əslində stress yaratdığını düşünənlər də var. Psixoloqlar hesab edirlər ki, ümumiyyətlə, məktəb yaşlı uşaqlara bu oyuncağın alınması məsləhət deyil.
Güclü piar olunan çarxın paytaxtda ən çox satılan oyuncaq olduğunu satıcılar da təsdiqləyirlər.
Azad İstehlakçılar Birliyinin sədri Eyyub Hüseynov deyir ki, oyuncaqla bağlı onlara hər hansı şikayət daxil olmasa da, zəng edib "stress çarxı"nın ziyanlı olub-olmadığını soruşanlar var. Təbii ki, mən insanlara bu cür oyuncaqlardan uzaq olmağı məsləhət görürəm. Çünki uşaqlarda fırlanan cismlərə maraq bəzi beyin xəstəliklərindən xəbər verir. Valideyn də uşağına bunu almaqla onu xəstəliyə cəlb etmiş olur. Əksinə bu cihazlar daha çox stress gətirir, analitik düşüncəni zəiflədir. Uşaqlar təbiətlə təmasda olsalar, həyətdə oynasalar, onlar üçün daha faydalı ola bilər", - deyə E. Hüseynov bildirir.
"Stress çarxı"nın zərərli olduğunu psixoloqlar da təsdiqləyirlər. Uşaq psixoloqu Narınc Rüstəmovanın sözlərinə görə, valideynlər uşaqlarını belə oyuncaqlardan uzaq tutmalıdırlar. "Valideynlər həmişə asan yollara qaçırlar. Məsələn, düşünürlər ki, "uşaq əsəb keçirib, çarx verim, başını qarışdırsın". Əslində müasir dövrdə hər bir uşaq stressə məruz qala bilər. Çünki məktəbə gedir, dərslərə cavab verməlidir, evdə bacısı və ya qardaşı ilə hansısa konflikti yaşayır.