Zarafat eləmə qurbanın olum,
Bu dünya zarafat meydanı deyil.
Qarışqa yerişi rahat yerişdi,
Bu dünya köhlən at meydanı deyil.

Oynadıb çox şeyi umar oynama,
Etsə də ruhunu xumar oynama.
Sən bu qumarbazla qumar oynama,
Zarafat gəlməsin sənə bu dünya.

Çox yerdə qəbrini qazan olacağ,
Başın qaynamaqdan qazan olacaq.
Sanma yaşamağın asan olacağ,
Zarafat gəlməsin sənə bu dünya.

Yoxsulluq yoxsulun bağrına oxdu,
Mədəsi toxların məzəsi toxdu.
Fil var qarışqaca hörməti yoxdu,
Zarafat gəlməsin sənə bu dünya.

Çox yerdə məkirli oyun olacaq,
Şir pələng çevrilib qoyun olacaq.
Hələ neçə dəfə toyun olacaq,
Zarafat gəlməsin sənə bu dünya.

Ömrünü qar yeyib qış aparacaq,
Xırmandan dənini quş aparacaq.
Dünyadan əlini boş aparacaq,
Zarafat gəlməsin sənə bu dünya.

Qeybətin quyusu hiylənin toru,
Sənə diri-diri göstərər goru.
Başın var başını başsızdan qoru,
Zarafat gəlməsin sənə bu dünya.

Şeytan dura-dura şərlənər dəvə,
Qatır quyruğunda hərlənər dəvə.
Kinindən yıxılar tirrənər dəvə,
Zarafat gəlməsin sənə bu dünya.

Muğamı ağlamaq valı ağlamaq,
Valında qırılmış halı ağlamaq.
Fışdırıq çalmağın dalı ağlamaq,
Zarafat gəlməsin sənə bu dünya.

Yasın yeddisi var üçü qırxı var.
Qəbir yerinin də haqqı nırxı var
Ayə zalım oğlu, ölümdən sonra da hələ qorxu var
Zarafat gəlməsin sənə bu dünya.

Zəlimxan həsrətin yeddi qat olar
Həyatın qan dolu bir həyat olar,
Zarafat eləsən şahın mat olar,
Zarafat gəlməsin sənə bu dünya.
#zəlimxan_yaqub