‌Spirt haqqında.

Hərdən bəzilərinin spirtli içki görəndə siçandan qorxan madmuazel kimi hürkdüyünün şahidi oluram. Əvvəllər səbrim var idi - başa salırdım. Sonra bir şəkildə fikir vermədim, nə halları varsa, görsünlər dedim.

Amma yenə də yazım deyirəm.

Spirt və ya digər adı ilə alkohol bütün növ karbonhidratların - şəkərin mikroskopik maya göbələkləri yardımı ilə qıcqırmasından meydana gəlir.

Məsələn, pivədə arpa nişastası qıcqırır, spirt meydana gəlir.

Yaxşı, siz pivə içmirsiniz. Kvasda da buğda nişastası qıcqırır və spirt meydana gəlir.

Yaxşı. Kvas da içmirsinizsə, südü düşünün. Onun da içində laktoz deyilən süd şəkəri vardır. Qatıq, ayran, xama düzəldərkən laktoz qıcqırır və.....spirt meydana gəlir. Süd məhsullarından spirt formalaşmayan bir tək qaymaq yadıma gəlir (bəzi yerlərdə buna çiyə - südün üzü deyirlər). Onu da brusella riskinə görə yemək məsləhət deyildir.

Hər şeyi boş verin. O ətirli, təravətli, arasına pendir qoyub yediyiniz çörək ki var haaaaa, onun da içində spirt var. Doğrudur, çörəyi bişirərkən sobanın istisi spirti parçalayır, amma o gözəlim çörək o ətri və yumşaqlığı haradan alır?! Əlbəttə spirtdən və spirt əmələ gələrkən ortaya çıxan və xəmirin içində boşluqlar yaradan karbon qazından.

Bu gün yediyiniz yaxşı dəymiş əncirdən tutmuş çörəyə qədər hər şeyin içində spirt ya var, ya da olub.