k sıxaraq qonaq otağına doğru irəlilədik. Masada oturan Turala fikir vermədən valideyinləri ilə görüşüb anamın yanında əyləşdim.
-Əsma, canım tətilin necə keçdi?
-Sağolun, yaxşı keçdi.
Turalın anasının verdiyi sualı başımı qaldırmadan cavabladım. Mahirin xəyalını gözlərimin önünə gətirərk bədənimi əsir alan qorxunu dəf etməyə çalışırdım.
-Əsma, Tural və ailəsi toyun vaxtını təyin etmək üçün burdadırlar. Sən nə düşünürsən?
Atamın zəhimli səsindən sonra baxışlarımı evdəkilərin üzündə gəzdirməyə başladım. Hər kəs mənim cavabımı gözləyirdi, daha doğrusu eşitməyə alışqın olduqları "ata siz necə məsləhət bilirsizsə elə olsun" sözlərini söyləyəcəyimdən əmin bir şəkildə baxırdılar. Baxışlarımı Turala çevirdiyimdə üzündə sırtıq bir gülümsəmə ilə özündən razı baxışları məndə ikrah hissi yaradırdı. Başımı çevirib Səmraya baxdığımda isə onun gözlərini qırparaq məni cəsarətləndirməyə çalışdığını gördüm.
-Əsma.
Atamın səsləməsi ilə dillənməli olduğmu anladım və dilim ilə qurumuş dodaqlarımı yaşlayıb:
-Mən evlənmək istəmirəm. -Baxışlarımı atama yönəldərək səsim titrəmədən qəti fikrimi söylədim. Atam kəskin və iti baxışlarını üzümdə gəzdirərək:
-Nə dedin?-deyə sualını ünvanladı.
Ayağa qalxıb atama tərəf addımladım.
-Mən evlənmək istəmirəm.
Atam da ayağa qalxıb qarşımda dayanaraq çiyinlərimdən tutdu.
-Əsma, sən... Sən nə danışdığını bilirsən?
-Mən başqasını sevirəm ata, evlənmək istəmirəm.
-Etibar!!!
Turalın atası Osman bəyin yüksək səslə çığırması ilə atam tutduğu çiyinlərimi sıxaraq dişlərini qıcadı.
-Sən... Sən nələr danışırsan belə?
-Mən evlənməyəcəm, başqasını sevirəm... Mən evlənməyəcəm, başqasını sevirəm.
Dayanmadan eyni cümləni təkrar edirdim eynən danışmağı təzə öyrənən körpələr kimi.
-Evlənməyəcəm. Başqasını sevirəm. Evlənməyəcəm.
Yanağımda hiss etdiyim istilik ilə susmuş, əlimi yanağıma tutmuşdum. Atamın vurduğu sillə yanaqlarımı yandırıb gözlərimdən yaşların süzülməsinə səbəb oldu. Ancaq mən bütün bunlara baxmayaraq dayanmadan sözlərimi təkrar