KİŞİLİK.

Kişilik köklənmiş şux tara bənzər,
Dövran mizrab olub dindirər onu.
Hər sim bu nəğməni bir xalla bəzər,
Zaman ucaldar, gah endirər onu.

Bir simi - cəsarət, bir simi - hörmət.
Bu səsin ən incə xalıdır mərdlik.
İnilti qatammaz bu səsə həsrət,
Bu nəğmə əlində qəm çilik-çilik!

Bir simi - etibar, bir simi - vüqar.
Bu səs göydən gələn erkək səsidi!
Kişilik sözündə minbir məna var,
Ata - kişiliyin bünövrəsidi!

Bir simi - məhəbbət, bir simi - nifrət.
Biri bəmidirsə, biri zilidi.
Etiraf - yaşar saf! Fəqət Həqarət
Kişilik sözünün son mənzilidir.