indi, bu dəqiqə, bu an:
bir kəpənək qanad çalmırsa dünyanın bu başında
demək kimsə okeanın o tayında havasızlıqdan boğulur…
indi Suriyada, Hələbdə öldürülürsə uşaqlar
yəqin Himalayın ətəklərində hansısa kənddə doğulur

-doktor, reankarnasiya gerçəkdirmi?

indi, bu dəqiqə, bu an
öz həyatımı canlandırıram absurd teatr səhnəsində
və heç kəs anlamır ki, mən həqiqətən ölürəm.
alqışlarla endirin məni səhnədən, başım gicəllənir
biri çiçək uzatsın məzarımın üstünə, mən də birazdan gəlirəm…

-Doktor, ölmədən məni sevmək ehtimalın varmı?

indi, bu dəqiqə, bu an
dünyanın bütün uşaqlarına nağıl oxuya bilərəm
günəş batmadan sev məni, sonra əllərim donacaq…
dünyadakı bütün sevgilər yad dildədir, öyrənirəm
və bütün yoxluqlar sənsən, və hər şey yox olacaq

-Doktor, morfinsiz kəsə bilərsənmi əllərimi?

Cəlil Cavanşirin "ən"lərindən ...