Məsciddəyəm, kim var ki, bir Allahdı bir də mən.
Susuram, danışıram, darıxıram yerdə mən.

Bir küncdə oturmuşam əllərimi yoruram.
Allah evindən göyə duaları qovuram.

İnsan günah edəndi, Tanrı bağışlayandı.
Bu gün yenə içirəm dünən pozduğum andı.

Burda təqvim hicridir, burda şəvval ayıdır.
Günahlar maneədir,
Dua dilimdən çıxır minarədən qayıdır.

Bu evə gəlib gedən neçə milyon adam var.
Məscidin imamından çox şey bilir divarlar.