Hələ çox arzu batacaq
bu iyrənc bataqlıqda,
Hələ çox ümid buxara çevriləcək səmada.
Böyüyüb ata olmaqdan qorxacaq,
atasını itirənlər uşaqlıqda.

Döyüşlər olacaq, qanlı döyüşlər.
Üsyan, xaos, aclıq.
Acları doyuracaq diktatorlara ünvanlanan söyüşlər.
Hələ çox davam edəcək "Yer"də bu çirkin gedişat.
Fəzada genişlənmə,
Günəşdə partlayış,
Marsda həyat.

İnsanlar baş götürüb qaçacaq insanlıqdan.
Dünya bazarında ölüm ucuzlaşacaq bir az da.
Bəlkə də adamlar tüstü kimi yox olacaq,
ölüm olmayacaq bir azdan.

Bütün həqiqətlər güllələnəcək,
məsumiyyət edam olunan günün səhəri.
Medal asılacaq nifrətin boynundan.
Qana bulaşmış tozda boğulacaq
küləklər şəhəri.

Hələ neçə məhbus azadlıq şərbətindən zəhərlənəcək.
Mənəviyyat inqilabın ilk günü kürəyindən vurulacaq.
"Qərb"də insanlar yaşamaqdan, "Şərq"də ölməkdən yorulacaq.
Hələ çox əsgər sevgilisinin şəkli sinəsində can verəcək.
Sevənlərsə bilir,
bəzən gec gələnlər də tez gedə bilər.
Görəsən doğrudanmı bəşəriyyəti yalnız sevgi xilas edə bilər?!

(Pərviz Arif)