Zigmund Freud öz ümumi psixoanalizində insanın ehtiras amilini önə çəkmişdir.
Ehtirasın əsas predmeti kimi də insanın seksual ehtiraslarını daha qabarıq ifadə etmişdir.

Mənə görə Freud seksi çox ifrata gətirmişdir. Seks bioloji-psixoloji həyatın mühüm komponenti olsa da, zənnimcə lap o qədər də ifrat dərəcədə üzərində durulması gərəkli deyildir.
İnsanın anlıq ehtiraslarının, hətta müəyyən pozuntu hallarının belə psixoloji olaraq düşüncəyə sırf bioloji prizmadan yeridilib onun bütün həyatına şamil edilməsi, ümumən psixoanalizdə ehtirasın ən başda seksual çalarlarla ölçülməsi mənə görə əsas deyildir.
Zatən Freud seksual mövzularda ifrata vardığından hətta ona ən yaxın bir neçə psixoloq belə ondan uzaqlaşmışdır.

Ehtirasın insan həyatındakı ən böyük təzahürünə gəldikdə isə, bu seks deyildir. İnsanın ən böyük ehtirası hakimiyyətdir.
Seksual ehtiras anlıqdır, tükənəndir, tez qızışıb ani sönəndir. Ancaq insanın hakimiyyət ehtirası daimidir, tükənməzdir, nüvə reaksiyası kimi qızışdıqca daha da artandır.