Amerika və Avropada da haramlara verilən sərbəstlik bizim “müsəlman” ölkələrində də verilib. Bəs necə olur ki, küfr və fasiqlik yönündə hər iki toplum eyni həyatı yaşadığı halda, onlar durmadan elmdə tərəqqi edir, biz isə yox. Toplum olaraq hər ikimiz günahkar bir həyat yaşamırıqmı?!! Bəlkə Uca Allah elmi yalnız onlara verib?! Xeyr! Bizdə Əl-Xərazmi riyaziyyatda Alqoritmi kəşf edəndə Avropa barmaq hesabı edirdi. Optika və mexanikaya dair 89 əsər vermiş İbn Heysəm optikanın atası adlananda Avropalılar ümumiyyətlə hələ yuxudan ayılmamışdılar. Cabir Bin Həyyan xlorid və nitrat turşularının sintezini, kimyəvi məhlulların distillə edilməsi və kristallizasiya kimi kimyəvi prosesləri kəşf edəndə Avropaliların kilsədə Apollos duaları oxumaqdan başqa bildikləri bir şey var idimi?!. Əl-Biruni cisimlərin sıxlığını təyin edən cihaz düzəldəndə, hidrologiyaya, mineralogiyaya aid bir sıra tədqiqatlar aparanda Avropada keşişlər cənnətə qəbz satmaq ilə məşğul olmurdularmı?! O zaman niyə indi əksi olmuş. Niyə onlar irəlidə, biz isə geridə qalmışıq. Bunun cavabı çox sadədir. Səbəb budur ki, onlar Allahın tabe olunmasını əmr etdiyi düzənə(qanunlara) hər bir işlərində xəyanət etsələr də , fəqət ELMDƏ XƏYANƏT ETMİRLƏR. Məsələn, Amerikada yaxud Avropada müsəlman ölkələrində olduğu kimi qanmazın biri professor dərəcəsi ala bilməz. Belə birini nəinki Oksford, Kembric universitetdə bölüm başqanı, heç lobində xadiməçi belə götürməzlər. Bizim geriləməyimizin səbəbi budur. Yoxsa ki, Allahın qoyduğu həddləri aşmaqda biz heç də onlardan geri qalmırıq. Sadəcə, bizim "xəstələr" elmdə onlar ilə yarışmaq əvəzinə, “daha hansı azğın hərəkəti onlardan çox edə bilərik, görəsən”,-deyə yarışırlar. Bu da sonda bizi kölələşdirir.