Şəmkirin keçmiş icra başçısının oğlunu öldürən Vüqar da bir gün azadlığa çıxa biləcək. Ömürlük həbs cəzası üzərindən götürülüb. Nişanlısı Lamiyə ilə birlikdə həbs eləmişdilər. Vüqar ömürlük cəza almışdı, Lamiyəyə 10 il iş vermişdilər. Qıza yeni cinayət işi açılmışdı deyə, azadlığa 11 il sonra – 2014-cü ildə çıxmışdı. Vüqarı təxminən 7 il sonra həbsdən buraxacaqlar...
Ürək nə istərdi? Onlar uzun illərin ayrılığından sonra görüşürlər. Onlar sevgisinə ləkə düşməsinə imkan verməyiblər. Onlar həm də icra başçısının oğlunun bir mahalı bürüyən ləyaqətsizliynə son vermişdilər. Bundan sonra birlikdə xoşbəxt yaşamağa layiqdilər. Nə əsər yazılası, film çəkiləsi mövzudu...
Təəssüf, həyat bizim istəklərimizlə hesablaşmır. Məsələn, dünyanın ən yaxşı oğlanı ilə dünyanın ən yaxşı qızını evləndirmək olmur. Və ya həyat dünyanın ən yaxşı adamlarına kiçik istəkləri də çox görür. Həyat bəzən lazım olandan da sərt davranır. Vüqar və Lamiyə ilə davrandığı kimi...
Lamiyə 2014-cü ildə azadlığa çıxanda qucağında tamam başqa adamdan dünyaya gətirdiyi körpəsi vardı. Vüqar iki il əvvəl qohumuyla evlənib, keçən ilin avqustunda övladı doğulub. Tamam fərqli həyatlar. Onlar bəlkə heç görüşməyəcəklər də...