1. Prezident Ərdoğanın qərarı ilə Türkiyə İstanbul Konvensiyasından çıxdı.

Tam adı "Qadınlara qarşı zorakılıq və ailədaxili zorakılığın qarşısının alınması, belə hallarla mübarizə üzrə Avropa Şurası Konvensiyası" olan sənədi 2011-ci ildə ilk imzalayan və ilk ratifikasiya edən ölkə məhz Türkiyə olmuşdu. Türkiyə bu sənədə TBMM qərarı ilə qoşulduğu üçün prezident qərarı ilə oradan çıxmağın Konstitusiyaya nə dərəcədə uyğun olduğu hazırda ölkədə müzakirə mövzusudur. Qərarın AKP-ni dəstəkləyən təriqətlərin basqısı ilə alındığı yönündə ortaq rəy var.

2. Mərkəzi Bankın sədri Naci Ağbal vəzifəsindən uzaqlaşdırıldı.

N. Ağbal bu vəzifəyə prezident tərəfindən 4,5 ay əvvəl təyin olunmuşdu. Həmin vaxt (noyabr, 2020) xəzinə və maliyyə naziri, prezidentin kürəkəni Berat Albayrak və MB rəhbəri Murat Uysal TL-nin ucuzlaşması və 128 milyard dollarlıq rezervin bitirilməsi səbəbi ilə vəzifədən çıxarılmışdı. N. Ağbal gəldikdən sonra kəmiyyət daraldılması siyasəti ilə maliyyə bazarında sabitlik yaratmağa nail olmuşdu. Sonuncu faiz artımı qərarı 2 gün əvvəl verilmiş və uçot dərəcəsi 19%-ə yüksəldilmişdi.

Lakin bu qərardan sonra dünən Berat Albayraka məxsus "Sabah" və "Yeni Şafak" qəzetlərində N. Ağbal tənqid atəşinə tutuldu, hətta onu Türkiyəyə qarşı "operasyon çəkmək"də ittiham etdilər. N. Ağbal prezidentin qərarından sonra "vəzifədən çıxarıldığıma görə şükranlarımı ərz edirəm" deyə mənalı tvit atıb.

3. İstanbuldakı Gəzi Parkı şəhər bələdiyyəsinin tabeliyindən çıxarılaraq Sultan Beyazid Vəqfinə verildi. Bu qərar Əkrəm İmamoğlunun qol-budağını sındırmaq siyasətinin davamıdır.

HDP-nin qapadılması haqqında Konstitusiya Məhkəməsi qarşısında məsələ qaldırılması, HDP millət vəkili Ömər Faruk Gərgərlioğlunun bu statusdan məhrum edilməsi də Türkiyədə həftənin önəmli olayları sırasındadır.

Prezident Ərdoğan martın 3-də İnsan haqları ilə bağlı Fəaliyyət Planı açıqlamışdı... :)