Adını yəqin ki, azı bir dəfə eşitdiyiniz bu sindrom ümumiyyətlə nədir?

Daun sindromu zamanı insandakı 23 cüt xromosom yığınının 21-ci cütündə, genetik pozulma nəticəsində 2 yox, 3 xromosom olur, yəni trisomiya baş verir. Və ümumi xromosom sayı 46 olmalı ikən, 47 ədəd olur.

Daun, istənilən nəsildə özünü göstərə bilər. Həmçinin qız və oğlanlarda ciddi fərqliliyə malik deyil.

Bu insanlarda eşitmə və görmə zəifliyi, mədə-bağırsaq sistemi pozuntuları, ürək qüsurları, əqli inkişaf geriliyi müşahidə olunur.

Xarici görkəmlərindəki fərqlər isə bunlardır: qısa boy, yastı üz, əyri dişlər, göz bucağında dəri büküşləri, uzunsov gözlər, qısa barmaqlı enli ovuclar.

Sindromun adı isə, 1866-cı ildə, ona ilk dəfə düzgün təsvir vermiş alim Con Daunun adına əsasən qoyulmuşdur.

Sindromun yaranma səbəbləri nədir ?

Bu, genetik bir patologiyadır. Gücləndirici faktorlar isə 40 yaş üstü hamiləlik, radiasiya, narkotik və s. ola bilər.

Əslində, bu tarix heç də təsadüfi seçilməyib : 21/03. Yəni, 21-ci cüt, 3 xromosom.

Daun Sindromlu insanlar, məhdud anlama bacarığına, böyük və kiçik motor problemlərinə sahibdir. Həmçinin, qulaq və göz infeksiyalarına meyillidirlər, əzələ & oynaqları olduqca zəif inkişaf edir.

Üstəlik, Daun sindromlu insanlar əksər hallarda, uşaq və ya cavan yaşda vəfat edirlər.

Bəs, bütün bu "qüsurlar" onlardan vaz keçməmiz üçün keçərli səbəblərdir ? Qətiyyən.

Son illərdə aparılan çox sayda tədqiqatlar, cəhdlər göstərir ki, Daunlu uşaqlarla düzgün işlənərsə, onlar cəmiyyətə qazandırıla bilər.

Daun sindromlu insan hətta 70 il yaşaya bilər. Evlənib, sağlam uşaq dünyaya gətirə bilər. Güclü mexaniki yaddaşları və təqlid qabiliyyətləri ilə fərqli sahələrdə uğur qazana bilərlər.

Yetər ki, siz, biz, cəmiyyət bu insanlardan vaz keçməsin, onları həyata küsdürməsin...