Aşağıların birləşməsi sizə asan gəlməsin. Doğrudur, bəzən mən də xalqdan gileylənir, onu qorxaqlıqda, təşkilatlana bilməməkdə suçlayıram. Ancaq mən bunları xoş niyyətlə, xalqa müsbət mənada təsir etmək üçün yazıram. Eyni zamanda, çox gözəl bilirəm ki, bu çox çətin, hətta mümkün olmayacaq dərəcədə problemli məsələdir.

Güclü lider tələb olunur. Həm fiziki, həm psixi, həm də əqli, taktiki baxımdan. O liderin gərək siyasi kapitalı da olsun. Minimal da olsa maliyyə resursları hökmən vacibdir. Ancaq bunlar da onun uğur qazana biləcəyinə təminat vermir.

Onu hər an aradan götürə, öldürə bilərlər. Satın ala bilərlər. Yuxarılar ona çox asanlıqla alternativlər tapırlar. Tərəfdarlarını asanlıqla parçalaya bilirlər. Çünki pul və güc onların əlindədir.

Bu siyasi hərəkatdan tutmuş istənilən supermarketə qədər belədir. Xırda müəssisələrdə kim ki etiraza təşəbbüs göstərir, ona qapını göstərirlər. Şikayət etməyə isə yer yoxdur. Yaxud rüşvətlə hər işi həll etmək mümkündür. Ona görə deyirəm ki, məsələ siyasidir.

Birləşmək asan məsələ olsaydı, Azərbaycan xalqı çoxdan bu hökümətə qarşı birləşərdi. Çünki əksəriyyət onu sevmir, bununla belə hamı ona yaxın olmağa çalışır, yaltaqlanır Çünki necə lazımdır parçalaya və idarə edə bilirlər...