Mübahisələr zamanı arqumenti bitən bəzi adamların əsas silahı "Yəni mən yalan danışıram?" sualı olur. Bu sualın cavabında qalırsan kəsilə-kəsilə – nə "hə" deyə bilirsən, nə də "yox". Belə hallarda Molla Nəsrəddinin həmin adama deyə bilmədiyim bir lətifəsi yadıma düşür.
_________
Bir dəfə qonşu Molla Nəsrəddinin yanına gəlib, ondan bir neçə saatlıq eşşəyini verməyi xahiş edir. Molla təəssüflə bildirir ki, eşşəyi uşaqla meşəyə odun dalınca göndərib və onlar qaş qaralanda gələcəklər. Qonşu kor-peşman geri dönür. Darvazaya yaxınlaşanda Mollanın eşşəyi tövlədə anqırır. Səsi eşidən qonşu yenidən Mollaya yaxınlaşır və məzəmmətlə deyir:
– Ağsaqqal kişisən, ayıb deyilmi sənə?! Bəs deyirdin, eşşək həyətdə yoxdur – tövlədə anqıran eşşək tam əksini deyir axı...
Molla özünü itirmədən dərhal cavab verir:
– Ay qonşu, indi sən mən boyda ağsaqqala inanırsan, yoxsa eşşəyin birinə?