İnternetdə, xüsusilə Facebook sosial şəbəkəsində və digər ictimai portallarda böhtan və təhqir yazanların nəzərinə. Milli Məclisin İnternetdə böhtan və təhqirə görə təsdiq etdiyi cinayət məsuliyyəti yaradan "Cinayət Məcəlləsi"ni nəzərinizə çatdırmaq istəyirik.

Cinayət Məcəlləsi, Maddə 147
Böhtan
147.1. Böhtan, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə və ya kütləvi informasiya vasitəsində yayma — (Dəyişiklik: həm də İnternetdə)
— yüz manatdan beş yüz manatadək miqdarda cərimə ilə və ya iki yüz qırx saatadək müddətə ictimai işlər və ya bir ilədək müddətə islah işləri və ya altı ayadək müddətə azadlıqdan məhrum etmə ilə cəzalandırılır.

147.2. Ağır və ya xüsusilə ağır cinayətdə ittiham etməklə böhtan atma:
— iki ilədək müddətə islah işləri və ya iki ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır.

Cinayət Məcəlləsi, Maddə 148
Təhqir
Təhqir, yəni kütləvi çıxışlarda, kütləvi nümayiş etdirilən əsərdə və ya kütləvi informasiya vasitəsində (Dəyişiklik: həm də İnternetdə) şəxsiyyətin şərəf və ləyaqətini nalayiq formada qəsdən alçaltma:
— üç yüz manatdan min manatadək miqdarda cərimə və ya iki yüz qırx saatadək müddətə ictimai işlər və ya bir ilədək müddətə islah işləri və ya altı ayadək müddətə azadlıqdan məhrum etmə ilə cəzalandırılır.