Türkiyənin miqrasiya qurumunun hesabatına görə, hazırda Türkiyədə rəsmi yaşayış icazəsi (oturum izni) ilə yaşayan əcnəbilərin sayı 1,1 milyon nəfərdir. (Suriyalılar bura daxil deyil) Son 10 ildə Türkiyədə yaşayan əcnəbilərin sayı 10 dəfə artıb. İraq, Türkmənistan, İran və Özbəkistandan sonra ölkədə oturum izni ilə ən çox azərbaycanlılar yaşayır. Hazırda Türkiyədə oturum izni ilə yaşayan azərbaycanlıların sayı 56.438 nəfərdir. 2015-ci ildə bu rəqəm 32 min olub. Yəni, 5 ilə 24 minə yaxın artım. Qaçaq yaşayanları və vizasız qalma müddəti bitdikdə giriş-çıxış edib yaşayanları nəzərə alsaq yəqin ki, 56 min rəqəmi bir neçə dəfə artardı.

Türkiyədə oturum izni ilə yaşayan 56 mindən çox azərbaycanlının 10.356 nəfəri tələbədir. Bu o deməkdir ki, Türkiyədə təhsil alan hər 9 əcnəbi tələbədən biri azərbaycanlıdır. Azərbaycanlılar tələbə sayına görə Türkmənistandan sonra ikinci yeri tutur. Azərbaycanın lider olduğu oturum izni növü isə ailələr üçün nəzərdə tutula yaşayış icazəsidir. Bu tip oturum izni Türkiyə vətəndaşı ilə evlənənlərə və ya Türkiyədə rəsmi yaşayış icazəsi olan birinin ailə üzvünə verilir. Azərbaycanlılardan sonra ən çox ailə oturum icazəsi verilən ölkə vətəndaşları Rusiya və Ukraynadandır.

Türkiyə Statistika Komitəsinin məlumatına görə, 2020-ci ildə Türkiyə vətəndaşı olan kişilər xarici ölkə vətəndaşı olan 19 min əcnəbi qadınla evlənib. Onlardan iki minə yaxını azərbaycanlı olub. Azərbaycanlılar bu göstəriciyə görə sadəcə suriyalılardan geri qalıb.