uyğunlaşdıra bilir və tələbatını azaldır.
Amma necə yeməyəsən? Məsələ budur. Mənə görə, birinci, onun nə qədər təhlükəli olduğunu dərk etməli, özünü maarifləndirməli, bu iş beyində həllini tapandan sonra praktikaya keçməlisən.
Hamının ala biləcəyi ucuz və faydalı yeyəcəkləri həmişə məsləhət eləmişəm doğmalarıma.
Azərbaycana gedişlərimin birində simvolik olaraq, hər bacıma bir paçka yulaf əzməsi alıb aparmışdım, şirniyyat, konfet əvəzi. “Səhərlər yulaf yeməyi öyrənin və nəticəsini görəcəksiz” demişdim. Bişirmək qaydası da çox sadə, su və azacıq duz, 2-3 dəqiqəyə hazırdı. Dad qatmaq üçün evdə varsa, azacıq darçın və kasıbın olanından, hər hansı bir meyvəni də doğrayıb ata bilərsiz işinə.
Sonralar bacım demişdi ki, bəs heç demə, yulaf hazır olandan sonra içinə bir barmaq kərə yağı və iki qaşıq pesok tökəndə daha yeməli olurmuş.
Tanışlardan biri də “Yulafı-mulaf boş şeydir, şəkərimi yeyirəm, üstündən də inusilinimi vururam, heş zad da olmur” demişdi.
Evimə cola, fanta, “meyvəli” içəcəklər, tortlar, şirniyyatlar, almayalı uzun illər oldu. Və, bəlkə, həm də bunun nəticəsidir ki, uzun zamandır evdəki aptek siyirtməsində baş ağrısı dərmanı özünə başqa növ dərman yoldaşları tapmaqda çətinlik çəkir.
Qızım, şirniyyat, xüsusən, şokolad xoşlayandı. İllərlə apardığımız “təbliğat” və özünün səyi nəticəsində, şəkərin nə qədər təhlükəli olduğunu dərk eləyəndən sonra ondan uzaqlaşa bildi.
Məlumat üçün deyim ki, İsveşdə, valideynlər, dişlərə və sağlamlığa zərərli olduğu üçün, uşaqlara həftənin yalnız bir günü, şənbə günləri şirniyyat alarlar.
Burada hansı uşaqdan “nyttig mat” yəni “faydalı qida” nədir və hansılardır, deyə soruşsan, cavab verə bilər. Çünki bağça, məktəb, televizor, kitablar, böyüklər...hamı faydalı yeməyin nə olduğundan danışır. Keçən cümə bağça müdiriyyətinin özünün hazırladığı şəkərsiz manqolu dondurmaları sevə-sevə yedi uşaqlar.
Bizsə hələ də qonaq getdiyimiz yerə, evdəki uşaqlar üçün əlimizdə şirniyyat aparmaq səviyyəsində ilişib qalmışıq.