yaradılmasında əvəzsiz rol oynadı. O dövrün mütəfəkkir insanları xalqın milli birliyinin
təşəkkülündə mühüm rol oynayan milli marşlara, milləti birliyə səsləyən, millətin ruhunu yüksəldən milli
nəğmələrə üstünlük verir, onların yaradılmasını zəruri sayırdılar. Bu baxımdan Azərbaycan Xalq
Cümhuriyyətinin yaranmasından xeyli əvvəl, yəni 1917-ci il dekabrın 17-də "Açıq söz" qəzetində görkəmli
yazıçı və ictimai xadim Yusif Vəzir Çəmənzəminlinin çap etdirdiyi "Zəruri məsələlər" adlı yazısı və həmin
məqaləyə cavab olaraq dahi Üzeyir Hacıbəyovun "Açıq söz" qəzetinin 22 dekabr 1917-ci il tarixli sayında dərc
olunmuş "Milli marş" adlı çox qiymətli məqaləsi xüsusilə diqqəti cəlb edir. Hələ müstəqilliyə qovuşmadığımız o
illərdə Yusif Vəzir Çəmənzəminli milli istiqlal mübarizəsində xalqın vətənpərvərlik və qəhrəmanlıq duyğularını
yüksəldən, onu istiqlala, müstəqilliyə, azadlığa səsləyə bilən milli marşlara olan böyük ehtiyacdan danışarkən
"Zəruri məsələlər" məqaləsinin "Milli şərqi" bölümündə yazırdı ki, hər bir millətin özünəməxsus bir milli
nəğməsi var, o nəğmə oxunduqda millət fərdlərinin ruhu ucalır, mübarizə edib öz xalqını mühafizə etmək xahişi
artır, bizimsə bu nəğməmiz yoxdur, düşməni yıxmaq üçün milli nəğməmiz lazımdır. Yusif Vəzir burada
Azərbaycan xalqını milli birliyə, Vətənin və millətin taleyi üçün mübarizəyə, qəhrəmanlığa səsləyən milli
marşların yaradılması vəzifəsinin şairlərin, ilk növbədə bəstəkar Üzeyir Hacıbəyovun üzərinə düşdüyünü xüsusi
vurğulayırdı.
Yusif Vəzir Çəmənzəminlinin qaldırdığı bu taleyüklü məsələ – milli marş yaratmaq zəruriyyəti dahi
Üzeyir Hacıbəyovun diqqətini cəlb edir və ona dərhal cavab verir. Azərbaycan xalqının milli iftixarı Üzeyir bəy
"Milli marş" məqaləsində milli marşın – milli himnin yaradılmasının xalqımız üçün əhəmiyyətindən danışırdı.
Üzeyir Hacıbəyovun hələ 1917-ci ilin sonlarında sözlərini və musiqisini yazdığı, həmin il dekabrın 23-də
orkestr tərəfindən ifa edilmiş "Milli marş"ın, yəni