Ağcabədi rayonu
Yaranma tarixi - 08.08.1930
Ərazisi -1,76 min kv. km
Əhalinin sayı - 136,8 min nəfər (1 yanvar, 2020-cı il)
Əhalinin sıxlığı – 1 kv. km 78 nəfər (1 yanvar 2020-cı il)
Şəhər - 1
Kəndlərin sayı - 44
Qəsəbələrin sayı – 1
Ağcabədi rayonu ilə Bakı arasında olan məsafə - 263 km.

Ümumi məlumat

Ağcabədi rayonu 1930-cu ildə təşkil olunub, 1963-cü ildə ləğv olunub, Ağdam rayonunun tabeliyinə
verilmiş, 1965-ci ildə isə yenidən müstəqil rayon olmuşdur. Ağcabədi rayonu Kür-Araz ovalığının Mil və
Qarabağ düzlərindədir. Mərkəzi Ağcabədi şəhəridir.
Rayona Ağcabədi şəhəri və Sarvanlar, Kürdlər, Minəxorlu, Qaravəlli, Gələbədin, Avşar, Muğanlı,
Şahsevən, Köyük, Təzəkənd, Xocavənd, Salmanbəyli, Aşağı Avşar, Hindarx, İmamqulu-bəyli, Mirzəhaqverdili,
Sarıcalı, Taynaq, Poladlı, Böyük Kəhrizli, Bala Kəhrizli, Şərəfxanlı, Şotlanlı, Şənlik, Hüsülü, Rəncbərlər,
Boyat, Hacılar, Qaraxanlı, Hacıbədəlli, Pərioğullar, Ağabəyli, Qaradolaq, Mehrablı, Kəbirli, Aran, Yeni
Qaradolaq, Nəcəf-qulubəyli, Qiyaməddinli, Şahsevən-Təzəkənd, Arazbarı, Şahmalılar, Biləyən, Cəfərbəyli,
Yuxarı Qiyaməddinli kəndləri daxildir.
Rayonun relyefi düzənlikdir, şimal-şərqdən cənub-qərbə doğru tədricən yüksəlir. Ərazisinin səthi
Antropogen sisteminin kontinental-allüvial və dəniz çöküntülərindən təşkil olunmuşdur. Gil yatağı vardır. İqlimi
mülayim isti, quru subtropikdir.
Orta temperatur yanvarda 1,2-1,7°C, iyulda isə 25-26°C-dir. İllik yağıntı 300-500 mm-dir. Çay şəbəkəsi
seyrəkdir. Şimal-şərq sərhədi ilə Kür çayı, mərkəzi hissədən Qarqar çayı axır. Rayonun ərazisindən Yuxarı
Qarabağ kanalı keçir. Ərazisində şor sulu göl var. Boz-çəmən, boz, çəmən-boz torpaqları yayılmışdır. Mərkəzi
hissədə şor və şorakət torpaq sahələrinə təsadüf olunur. Bitkiləri çöl və yarımsəhra tiplidir. Kür çayı sahilində
kolluqlar və seyrəlmiş Tuqay meşələri vardır. Heyvanları: ceyran, canavar, çöldonuzu, çaqqal, tülkü, bataqlıq
qunduzu, porsuq, boz dovşan, Kiçik Asiya qum siçanı və s.