hissəsində dağ meşələri, Kür çayı sahilində tuqay meşələri var. Heyvanları: ayı, canavar, tülkü, çöldonuzu, boz
dovşan, çölsiçanı və s. Quşları: qırqovul, turac, kəklik, göyərçin və s. Qarayazı qoruğu qismən Qazax rayonu
ərazisindədir.
Qazax kənd təsərrüfatı və sənaye rayonudur. Rayonun kənd təsərrüfatı üzümçülük, tütünçülük və
heyvandarlıq üzrə ixtisaslaşdırılmışdır. Taxılçılıq da mühüm yer tutur. Əsasən, yüngül və yeyinti sənayesi,
həmçinin tikinti materialları istehsal edən sənaye müəssisələri var.
Qazax vaxtilə oymaq, sultanlıq, sonralar isə qəza mərkəzi olmuşdur. Qazax 1909-cu ildən şəhər statusu
almış, indi rayon mərkəzidir. V. F. Minorskiyə, Z. M. Bünyadova və Ə. K. Əliyevə əsaslanan tarixçi-toponimist
T. M. Əhmədov qeyd edir ki, Qazağın əsası VIII əsrdə ərəb sərkərdəsi Mərvan ibn Məhəmməd tərəfindən
qoyulmuşdur. Qədim Azərbaycan dilinin tədqiqatçısı Q. Voroşil yazırdı ki, «Elə Qazağın özü də yeni şəhər
deyildir, onun 1270 il əvvəl də şəhər kimi mövcudluğu barədə IX-X əsr qaynaqlarında məlumatlar vardır».
Təqribən XV əsrin sonlarında Qazax sultanlığı yaradılmışdır. Səfəvilərin dövründə Qazax sultanlığı
Qarabağ bəylərbəyliyinə daxil idi.
Qazax sultanlığının hakimləri sultan titulu və irsi hakimiyyətə malik idilər. XVI əsrin 80-ci illərində Türk
ordusunun təzyiqi ilə səfəvilər Azərbaycanı tərk etdikdə Bayat, Qaçaq, Qaramanlı və başqa tayfalardan fərqli
olaraq Qazaxlar öz ərazilərini tərk edib İrana getmədilər. Sultanlığın başçısı Nəzər xan türklərin hakimiyyətini
qəbul etmiş və bununla da mahalın müstəqilliyini əldə saxlamışdır. İkinci dəfə Azərbaycan, o cümlədən Qazax
mahalı yenidən səfəvilərin hakimiyyəti altına keçəndən sonra da Nəzər xan öz hakimiyyətində qalmışdır. Hətta
onun xələfi Şəmsəddin xan 1605-ci ildə I Şah Abbasdan xan rütbəsi almışdır. Osmanlılar yenidən hücum edib
Qazağı aldıqdan sonra (XVIII əsrin əvvəlləri) Qazaxda inzibati ərazi bölgüsü aparmışlar. Belə ki, Qazax sancaq
elan edilərək 4 nahiyəyə