BANK - MALİYYƏ SEKTORU
Hər bir iqtisadi sistemin inkişaf səviyyəsi maliyyə-bank sektorunda mövcud münasibətlərin səviyyəsindən xeyli asılıdır. Bunu nəzərə alaraq muxtar respublikada bank xidmətləri sektorunun inkişaf etdirilməsində əsas amil olan infrastrukturun formalaşdırılması üçün zəruri tədbirlər görülməkdədir. Hazırda muxtar respublika ərazisində 1 bank, 6 bankın idarə, filial və şöbəsi, 3 bank olmayan kredit təşkilatı fəaliyyət göstərir.


Azərbaycan Respublikası Milli Bankı Naxçıvan Muxtar Respublikası Idarəsi muxtar respublika ərazisindəki kredit təşkilatlarının fəaliyyətinə nəzarət edir, nağd pulun emissiyasını, tədavülünü təmin edir, xəzinədarlığa xidmət göstərir və büdcənin kassa icrasını həyata keçirir.

Kapital Bank Açıq Səhmdar Cəmiyyətinin Naxçıvan Muxtar Respublika Baş Idarəsi muxtar respublikanın bütün rayonlarında filial şəbəkəsinə malik olan yeganə bankdır.

Bundan başqa Azərbaycan Beynəlxalq Bankı Naxçıvan Muxtar Respublika Baş Idarəsi filialı, «Rabitə bank» Açıq Səhmdar Cəmiyyətinin Naxçıvan şöbəsi, «Bank of Azerbaijan» Açıq Səhmdar Cəmiyyətinin Naxçıvan filialı və «Xalq bank»


Açıq Səhmdar Cəmiyyətinin Naxçıvan şöbəsi muxtar respublika ərazisində fəaliyyət göstərən müəssisə və təşkilatlara, həmçinin əhaliyə müxtəlif növ bank xidmətlərini həyata keçirirlər.

2008-ci ildə muxtar respublika ərazisində bütün növ bank xidmətlərini həyata keçirən «Naxçıvan Bank» Açıq Səhmdar Cəmiyyəti fəaliyyətə başlamışdır.

Muxtar respublikada fəaliyyət göstərən «Naxçıvan Kredit» Bank Olmayan Kredit Təşkilatı Məhdud Məsuliyyətli Cəmiyyəti və «Aqrarkredit» Səhmdar Kredit Təşkilatının Naxçıvan filialı aqrar sektorun və kiçik biznesin inkişafına köməklik məqsədilə kredit verilməsində yaxından iştirak edir. Həmçinin ipoteka kreditinin inkişafı məqsədi ilə muxtar respublikada Azərbaycan Respublikası Ipoteka Fondunun Naxçıvan filialı yaradılmışdır.