eşidəcəyi danlağa indidən hazırlaşırdı. Belə olan halda yazıq Yaşar nə edə bilərdi ki? Bilmirdi özünü içində ona bu qədər heyran gözlərlə baxdığına görə qınayıb ,tezliklə nəzər istiqamətini dəyişsin ,ya Bahara bir söz deyib ,onu nəhayət gözlədiyi azadlığa buraxsın. Hələ hara? Gözlər doymamışdı, ürək doymamışdı, əllər özünü güclə saxlayırdı, Baharı incə biləyindən tutub öz tərəfinə çəkməmək üçün.Yox, deyəsən əri dillənməyəcək kimi hiss etdi Bahar, indi sıra heç Yaşara keçmədən yenidən ona dönmüşdü, lap doğruluq ya cəsarət oyununda şüşə bir nəfəri ikinci dəfə göstərdiyi kimi.
-Məncə artıq gecdir. Ayağa qalxsaq yaxşı olar.- Bahar heç vaxt onda müşahidə edilməyən ciddiliklə dilləndi.Bu qədər gec oyanmaqlarının günahını öz üzərindən az öncə Yaşarın sinəsindən qalxdığı kimi atırdı, çətin olmasa da asan olmayan tərzdə.Yaşarın qaşları yenə qalxdı, dodaqları aşağı doğru əyilib ,çənəsində istehzalı qırış yaratdı- "Buna bir baax." deyirdi elə bil.Bahar buna məhəl qoymadı, qıraqdan onun yataqdan qalxdığını görən olsaydı heç Yaşarın üz ifadəsini görmədiyini zənn edərdi , ay-hay, Bahar çox gözəl görürdü hər şeyi. Hətta üzünü çevirib keçmiş və xoş zamanlarda xoşuna gəlməyən insanlara etdiyi kimi Yaşara da dil çıxarmaq , gözünün altını aşağı dartmaq istəyərdi ,bunun üçün özünü artıq çox yaşlı hiss etməsəydi. Onun ardınca Yaşar da ayağa qalxdı. Hara gedəcəyini ,nə edəcəyini bilməyən nadan qızdan fərqli olaraq Yaşar öz dostunun evini yaxşı tanıyırdı. Qapını açıb, Bahara baxmadan
- Hamam sağ tərəfdədir, - deməklə kifayətləndi. Bahar əynindəki libasa nəzər saldı və dərhal yataqla üzbəüz güzgüyə tərəf addımladı. Saçlar darmadağın, makiyaj yayılmış, Bahar illərlə evə getməyən , yolda yaşayan adamlara bənzəyirdi. Əlləri ilə üzünü örtüb, gülüb, ağlamaq arasındakı seçimi tam tuta bilməyən insanlar kimi utanc hissini bir neçə dəqiqə sakitləşdirməklə məşğul oldu. Yaşar necə dedi? "Hamam sağ tərəfdədir." Bahar ağlamasındı və əllərini yelləyərək hamama getdi, bunu etməyi heç istəməsə də