AZƏRBAYCAN
RESPUBLİKASININ
K O N S T İ T U S İ Y A SI
Azərbaycan Respublikasının Prezidenti HEYDƏR ƏLİYEVİN sədrliyi ilə Azərbaycan Respublikasının
yeni Konstitusiya layihəsini hazırlayan komissiya tərəfindən hazırlanmış, 1995-ci il noyabrın 12-də keçirilən
Azərbaycan Respublikası referendumunda qəbul olunmuşdur. 1995-ci il noyabrın 27-dən qüvvəyə minmişdir.
(24 avqust 2002-ci il və 18 mart 2009-cu il və 26 sentyabr 2016-cı il tarixli ümumxalq səsverməsi
(referendum) ilə edilmiş dəyişikliklərlə)

Azərbaycan Respublikasının Konstitusiyası

Azərbaycan xalqı özünün çoxəsrlik dövlətçilik ənənələrini davam etdirərək, «Azərbaycan
Respublikasının dövlət müstəqilliyi haqqında» Konstitusiya Aktında əks olunan prinsipləri əsas götürərək,
bütün cəmiyyətin və hər kəsin firavanlığının təmin edilməsini arzulayaraq, ədalətin, azadlığın və təhlükəsizliyin
bərqərar edilməsini istəyərək, keçmiş, indiki və gələcək nəsillər qarşısında öz məsuliyyətini anlayaraq, suveren
hüququndan istifadə edərək, təntənəli surətdə aşağıdakı niyyətlərini bəyan edir:
 Azərbaycan dövlətinin müstəqilliyini, suverenliyini və ərazi bütövlüyünü qorumaq;
 Konstitusiya çərçivəsində demokratik quruluşa təminat vermək;
 vətəndaş cəmiyyətinin bərqərar edilməsinə nail olmaq;
 xalqın iradəsinin ifadəsi kimi qanunların aliliyini təmin edən hüquqi, dünyəvi dövlət qurmaq;
 ədalətli iqtisadi və sosial qaydalara uyğun olaraq hamının layiqli həyat səviyyəsini təmin etmək;
 ümumbəşəri dəyərlərə sadiq olaraq bütün dünya xalqları ilə dostluq, sülh və əmin-amanlıq
şəraitində yaşamaq və bu məqsədlə qarşılıqlı fəaliyyət göstərmək.
Yuxarıda sadalanan ülvi niyyətlərlə ümumxalq səsverməsi — referendum yolu ilə bu Konstitusiya qəbul
edilir.

Birinci bölmə.

Ümumi müddəalar

1-ci fəsil.

Xalq hakimiyyəti

Maddə 1. Hakimiyyətin mənbəyi
I. Azərbaycan Respublikasında dövlət hakimiyyətinin yeganə mənbəyi Azərbaycan xalqıdır.
II. Azərbaycan xalqı Azərbaycan Respublikası ərazisində