Çox vaxt qripdən sonra üz nahiyəsində ağrılar hiss edilir. Həftələrlə davam edən ağrılara vaxtında əhəmiyyət verilmədikdə sonra gec olur.
Haymorit əng sümüyündə yerləşən Haymor mağarasının, yəni cibinin iltihabıdır. Haymorit kəskin zökəm, qrip, qızılca, skarlatina və digər infeksion xəstəliklərin ağırlaşması nəticəsində yaranır. Ən çox rast gəlinən səbəbləri isə yuxarı azı dişlərin köklərinin xroniki infeksiyaları və qan durğunluğudur. Haymorit sinusitin bir növüdür.
Haymorit və sinusit qış aylarının ənənəvi xəstəliklərindəndir və ən çox qripdən sonra ağırlaşmalar zamanı meydana gəlir. Burun, alın, gicgah və göz ətrafındakı içi hava dolu boşluqlar sinus adlanır və onlar kanallarla buruna açılır, kanalların içindən isə burun mukozası keçir. Mukozanın çıxardığı ifrazat burun içinə daxil olaraq tənəffüs yollarının isidilməsi və nəmli qalmasını təmin edir. Sinusit xroniki və kəskin olaraq iki hissəyə ayrılır.
Elə orqanizm var ki, sinusit xəstəliyi üçün daha çox risk altında və həssas olur. Nəfəsalma problemi ilə üzləşənlər, burun daxilinin əyri quruluşu və ya burun sümüyü travması alanlar sinusitə daha tez yoluxurlar. Soyuqdəymə və allergiyası olanlar da sinusitdən əziyyət çəkirlər. Siqaret və spirtli içki alüdəçiləri, bəzi infeksiyalara tez yoluxanlar da xəstəliyə qarşı həssaslıq nümayiş etdirirlər.
Xəstədə soyuqdəymənin bir həftədən çox davam etməsi sinusit hesab edilir. Sinusit zamanı üz, göz və baş nahiyəsində ağrılar olur. Baş ağrıları döyüntülü şəkildə davam edir, öskürərkən, ağır yük qaldırarkən və əyilərkən ağrıların artmasına həmin hərəkətlər əsnasında sinus içindəki təzyiqin artması səbəb olur.
Ağrıyan yerlərə təzyiq edilməsi həssaslığı daha da artırır. Baş ağrılarının davamlı olması kəskin sinusit əlamətidir. Sinusitdən əziyyət çəkənlərdə burun axıntısı davamlı və birtərəfli olur.
Bəzi xəstələrdə səs batıqlığı özünü göstərir. Boğaz ağrısı, kifayət qədər qoxu hiss etməmək və diş ağrısı sinusitli xəstələrin əsas şikayətləridir. Xəstədə çox vaxt