Bölüm.32

Təzyiq ölçüldükdən, qan analizləri alındıqdan sonra Bahara damcılayıcı qoşuldu və o yatdı. Bu müddət ərzində Yaşar onu gözdən qoymamışdı. Analizlər verilən zaman şöbənin bir başından digər başına var-gəl etdikdən sonra ayaqüstə güclə gəzən Baharı palataya yola salmış ,indi də yatağın yanında oturub, onun incə və arıq əlini öz isti ovucları arasında sıxaraq dodaqlarına yapışdırmışdı. Qızın uzun müddət sonra hüzura qovuşmuş üzünü və sonunda əldə edə bildiyi şirin yuxu ilə yatışını izləyirdi. Bahar dəyişmişdi. İlk dəfə gördüyü həmin gözəl-göyçək, saf və ən əsas sağlam qızdan əsər, əlamət yox idi. Ruhən çöküşü zahirinə də təsirsiz ötüşməmişdi. Çox yorğun , çox zəif idi. Yaşarın gözü nifrətlə o qədər örtülmüşdü ki, bütün bu dəyişikliklərdən xəbərsiz qalmışdı.
Əsmər həkim otağa girəndə, öz keçmiş dostunu bu vəziyyətdə görüb bir müddət dodaqlarında təbəssüm ilə onu izlədi. Yaşarı hələ məktəb zamanlarından tanıyırdı. Onların ataları iş birliyi bağlamışdılar. Fatehin interyer şirkəti üçün lazım olan materialları Əsmərin atasının şirkəti təşkil edirdi. Ona görə Əsmər ilə Yaşar bir-birlərini hələ məktəbdən öncə tanımış, məktəb zamanı isə münasibətlərini dərinləşdirmişdilər. Hər ikisi bir-birinin toyunda da iştirak etmişdilər. Lakin Baharı Əsmər ilk dəfə idi görürdü. Çox təəssüflənsə də, kənddə baş tutan toya gedə bilməmişdi. İndi onun özünün 5 yaşlı qızı var idi və Yaşarın ikinci dəfə evləndiyinə çox sevindiyi halda öz ailə vəziyyəti bu xoşbəxt gündə iştirak etmək imkanı verməmişdi ona. Əsmər Nurayla bağlı faciəni eşidəndə, ilk olaraq Yaşara baş çəkən dostlardan idi. Düzü, Yaşarın Cavidan və ondan başqa dostu da yox idi. Əsmər ilə aralarındakı tam dostluq da sayılmaz, sadəcə çox yaxın münasibət kimi qiymətləndirilə bilərdi. Yaşar onunla nə qədər soyuq davransa da, Əsmər hər zaman onun dadına yetişməyə hazır insanlardan idi. O, dostunun ikinci dəfə evləndiyini biləndə ,bu işdə Fatehin əli olduğunu anlamışdı. Öz həyat yoldaşını Yaşar kimi dəlicəsinə, hətta