Allergik konyunktivit – allergenlə kontakta cavab olaraq immun reaksiya nəticəsində yaranan konyunktivanın reaktiv iltihabıdır. Bu patologiya zamanı gözün selikli qişasının hiperemiyası və ödemi, göz qapaqlarının qaşınması və ödemi, gözün yaşarması, işıqdan qorxma (fotofobiya) inkişaf edir. Diaqnostika allerqoloji anamnezin toplanması, dəri testlərinin, provokasion allergik sınaqların (konyunktival, nazal, dilaltı), laborator müayinələrin aparılmasına əsaslanır. Allergik konyunktivitin müalicəsində antihistamin preparatlar (daxilə və yerli), yerli kortikosteroidlər, spesifik immunoterapiya istifadə olunur.

Allergik konyunktivit barədə ümumi məlumat
Allergik konyunktivit əhalinin təxminən 15%-də rastlanır və müasir allerqologiya və oftalmologiyanın mühüm problemidir. Görmə orqanının allergik zədələnməsi 90% hallarda konyunktivit, nadir hallarda isə allergik blefarit, göz qapaqlarının dermatiti, allergik keratit, uveit, irit, retinit, nevrit ilə müşayiət olunur. Allergik konyunktivit hər iki cinsə mənsub olan insanlarda, əsasən cavanlarda müşahidə olunur. Tez-tez başqa allerqozlarla – allergik rinit, bronxial astma, atopik dermatitlə müşayiət olunur.

Allergik konyunktivitin təsnifatı
Gözlərin allergik zədələnməsi pollinoz konyunktiviti, yaz keratokonyunktiviti, giqant hüceyrəli konyunktivit (hiperpapilyar konyunktivit), dərman konyunktiviti, xroniki konyunktivit, atopik keratokonyunktivit formasında baş verə bilər.


Gedişinə görə allergik konyunktivit kəskin, yarımkəskin və ya xroniki; meydana çıxma vaxtına görə mövsümi və ya il boyunca davam edən ola bilər.

Allergik konyunktivitin əsasında IgE ilə əlaqəli hiperhəssaslıq reaksiyası durur. Patologiyanın inkişafında həlledici faktor allergenin konyunktiva ilə birbaşa kontaktıdır; bu, tosqun hüceyrələrin deqranulyasiyası, limfositlərin və eozinofillərin aktivasiyası nəticəsində iltihabi-allergik reaksiya ilə kliniki cavaba gətirib çıxarır. Tosqun hüceyrələrdən xaric olunmuş mediatorlar (histamin,