Kiber təhlükəsizlik mütəxəssisləri, diqqəti Facebookda istifadə şərtlərində edilmiş yeni dəyişikliyə yönəldiblər...

Kiber təhlükəsizlik mütəxəssisləri, diqqəti Facebookda istifadə şərtlərində edilmiş yeni dəyişikliyə yönəldərək, istifadəçilərinə hesablarında ünvan və telefon məlumatlarını paylaşmamalarını qəti şəkildə tövsiyyə ediblər.

Facebook blogunda ötən günlərdə dərc olunan xəbərdə, proqramçıların sayta yüklədikləri proqramlara abunə olunarkən istifadəçilərdən istədikləri “icazə“yə ünvan və telefon məlumatlarının da daxil edildiyi qeyd olunmuşdur. Başqa sözlə, Facebookda bir proqramı istifadə etmək üçün administratora şəxsi məlumatlarınıza daxilolma icazəsi verməklə, kim tərəfindən və necə istifadə ediləcəyini bilmədən ünvan məlumatlarını da vermiş olacaqsınız.

Facebookda istifadəçilərin şəxsi məlumatlarına belə “münasibəti“ kəskin tənqid edən Kiber təhlükəsizlik mütəxəssisləri, qeyd edirlər ki, ünvan və telefon məlumatlarını əldə edən adminstratorlar istəsələr bu şəxsi məlumatları gəlir əldə etmək məqsədilə digər firmalara sata bilərlər ki, bu da sonda cinayət hadisələrinin kəskin artımına səbəb ola bilər.

İngiltərənin The Independent qəzetində dərc olunmuş xəbərə görə, proqramlara abunə olarkən telefon və ünvan kimi məlumatlar üçün ayrı və açıq icazə müddəti tətbiq olunmasına baxmayaraq, bu məlumatın necə istifadə ediləcəyi ilə bağlı heç bir zəmanətin verilməməsi böyük risk faktoru yaratmış olur.

Sophos informasiya təhlükəsizliyi şirkətinin nümayəndəsi Graham Cluley, bu cür məlumatların necə və kim tərəfindən istifadə ediləcəyi Facebook tərəfindən açıq şəkildə bildirilib məlumatların təhlükəsizliyinə zəmanət verilməyincə, istifadəçilərin öz şəxsi məlumatlarını Facebookdan götürmələrini tövsiyyə etmişdir.