Axıntının səbəbi aşkarlana qədər ağrı hissini azaltmaq üçün analgetiklərdən istifadə edilə bilər. Hərarət yüksək olduqda qızdırma salıcı vasitələrə gərək yaranır.


Konservativ terapiya
Həkim taktikası irinli iltihabın yayılmasından, xəstəliyin etioloji amilindən və pasiyentdə yanaşı patologiyaların olmasından asılıdır. Kəskin dövrdə fizioterapiya (UYT, elektroforez) qadağandır. Əlamətlər söndükdə medikamentoz terapiya bu üsullarla kombinə oluna bilər. Yerli müalicəyə uşaqlıq boşluğunun antiseptik məhlullarla (miramistin, xlorheksidin) yuyulması aiddir. Zöhrəvi xəstəliklərdə dərmanlar hər 2 cinsi partnyora təyin edilir.

Dərman preparatlarından əsasən aşağıdakılara üstünlük verilir:

Antibiotiklər. İnfeksiyanın törədicisi və onun antibiotikə həssaslığı nəzərə alınmaqla seçilir. Uşaqlıq və onun artımlarında ağır dərəcəli irinli proseslər aşkarlandıqda geniş təsir spektrinə malik 2-3 preparat kombinə edilir.
Dezintoksikasion məhlullar. İrinli ifrazatla müşayiət olunan xəstəliklər orqanizmin güclü intoksikasiyası ilə xarakterizə edilir. İntoksikasiyanı aradan qaldırmaq üçün qlükoza-duz məhlulları parenteral yeridilir.
İmmunomodulyatorlar. Onlar orqanizmin ümumi reaktivliyini artırır, yerli immuniteti stimulə edir, sağalma prosesini sürətləndirir. Xroniki qonoreyada immunostimulyasiya məqsədilə qonokokk əleyhinə peyvənd vurulur.
Cərrahi müalicə
Uşaqlıq yolundan üfunətli, irinli axıntı zamanı uşaqlıqda irin yığıntısı müəyyən edildikdə möhtəviyyatın evakuasiyası, sanasiyası və drenajlanma göstərişdir. Bartolin vəzin absesində irinlik yarılır, antibiotik məhlulları ilə yuyulur. Əksər hallarda orqanqoruyucu əməliyyatlarla kifayətlənilir. Toxumaların diffuz, irinli əriməsi ilə rastlaşdıqda uşaqlığın supravaginal amputasiyası, tubektomiya və yaxud adneksektomiya