Niyə gecədən qorxurlar? "Gecə qara, cücə qara", "gecənin xeyrindənsə, gündüzün şəri yaxşıdır" deyirlər. Niyə? Axı gecə gözəldir. Gəcə şəhər əsl üzünü göstərir. Günorta rahat yaşamağa qoymayan maneələr yox olur. İnsanlar azalır, sakitlik çökür. Gündüz görünən eyiblər ya itir, ya da əhəmiyyətli olmur. Gecə insanlar da daha səmimi olur. Adi vaxtda düşünməyə belə qorxduqlarını asanlıqla dilə gətirirlər. Ona görə etirafların, ayrılıqların çoxu gecə olur. Bilin ki, gecələr xatırladığınız, darıxdığınız insanı sevirsiniz. Ola bilər gün boyu yadınıza düşməsin. Amma öz fikirlərinizlə, hisslərinizlə baş-başa qalanda onu istəyirsiniz. Çox güman ki, yatıb səhər oyanandan sonra yenə unudacaqsınız. Müvəqqətidir. Çünki yenə gecə olacaq və yenə özünüzlə qalacaqsınız. Gecədən qorxmayın, gecə gözəldir.