Rəqəmlər də danışarmış
Danışır 71.....
Bu müddət ərzində çox şey gördük
15 yaşından xəstə ata-anasına işləyib baxan, balaca əlləri qabar-qabar olan 2004lərin şəhid olduğunu
"Ölənlə ölmək olmaz" ifadəsini təkzib edən şəhid atasının oğlunun nəşini görmədən öldüyünü
Atasının şəkli əlində heç nədən xəbəri olmayan İlaydaların gözlərinin içindəki acını
Şəhid atasının hələ dünyaya gəlməmiş, cinsiyyətindən belə xəbərsiz qaldığı oğlu Zeydin yetim qaldığını
Ağlamaqdan səsi batan, mən oğluma velosiped almırdım ki, yıxılar deyib şəhid oğlunun məzarı yanında yatan, şəhid halvası sizin evinizdə qaynamadığca sizə şirin gələcək deyib fəryadı göylərə çəkilən şəhid anasını
Ayın 11-i axırıncı dəfə yemək süfrəsində zəng gələn zaman, halallaşıb, həyat yoldaşına əsgər papağı nə qəşəng yaraşır deyib bəhanə edib sonuncu xatirə şəklini çəkdirən şəhidin ağlar qalan yarını
Qəlbimdə yanğı var, gözlərimdə yaş
Yoxluğun sındırır belimi, Qardaş
Sən demə həyatım səndən ibarət
Sənsizlik acıdan acıdır, Qardaş
Almısan cənnətin ən gözəl yerin
Cəhənnəm olubdur bu dünya, Qardaş
Biçarə qardaşın vaxtsız qocaldı
Aldın gəncliyimi apardın, Qardaş şeiri ilə ürəkləri parçalayan, Qardaşı şəhid olan balaca Qardaşın fəryadını
Qardaşının bayrağa sarılmış cəsədi üstə fəryad edən bacını
Bayrağa bükülmüş tabutunun üstündə ağlayacaq ata-anası olmayan, bu ölkənin yuxarıda oturanlarına zabit olmaq üçün 6 min yetim canı ilə verən, bu ölkə uğurunda şəhid olan Səbuhini
Gördük......