q Nərgiz bibidən yardım istəyərdi. Deyəsən indi də buna bənzər bir vəziyyət idi. Və deyəsən o, bibini də evə məhz bu məqsədlə çağırmışdı.
Mən Nərgiz bibiyə sarılıb onun kefini xəbər alaraq dönə-dönə o üz -bu üzündən öpdükdən sonra mətbəxdə özumə çay süzərkən Sədəfin ona dediklərini duydum.
-- Ötən gün Nəcibə xanım zəng vurmuşdu. Ümumiyyətlə son vaxtlar bizim Yağmurla olduqca maraqlanır, tez -tez xəbər alır. Söz arası bir- iki kəlmə eşitdirdi mənə də. Hiss etdim ki, ağzımı arayıb bu işə münasibətimi bilmək, fikrimi öyrənmək istəyir.
Bu məsələdən az- çox xəbərdar olduğum üçün mövzunun yenidən açılması əhvalımı korladı. Gözlərimi süzdürüb dərin bir of çəkdim.
-- Yenə başlandı da...
Nərgiz bibi Sədəfdən bunu duyanda bir qədər duruxdu.
-- Necə yəni... Onun oğlu hələ subaydır ki? Səhv etmirəmsə az yaşı olmaz onun ...
-- Yaşını deyə bilmərəm Nərgiz. Ancaq subay olmasına subaydır.
Arada elə də uzun sürməyən qısa sükut yarandı. Bu sükutu pozan Sədəf özü oldu. O, yarım qalan sözlərinə davam edərək əlavə etdi- Mən oğlanı kiçik yaşlarında görmüşəm. Daha sonra o, eşitdiyimə görə uzun illər Sankt -Peterburqda yaşayıb. Necə biri olduğunu düzü bilmirəm. Ancaq bir ailə kimi çox gözəl ailədirlər. Bunu sən özün məndən də gözəl bilirsən. Tofiq qardaşın eləcə də Nəcibə xanımın xətrini dünyalar qədər çox sevirəm. Ancaq bu hər şeyi həll etmir də. Bilirsən. Oğlana da az- çox bələd olmalıyıq.
-- Elədir.- Nərgiz bibi köks ötürüb Sədəfin fikrini təsdiqlədi.
Sədəf düşüncələrini sözlərə töküb narahatlığını gizlətmədi:
-- Məni narahat edən bilirsən nədir? Rəhmanla Tofiq uzun illərin dostlarıdır. Və mən bunu gözəl bilirəm ki, əgər Tofiq bu barədə söz salıb Rəhmana bir kəlmə xahiş etsə, Rəhman dostunu geri çevirib " Yox " deməyəcək. Bundan adım kimi əminəm!
Nərgiz bibi buna qətiyyətlə qarşı çıxıb olduqca kəskin danışdı:
-- Başa düşürəm, dostudur, sözünü yerə salmaya bilər. Ancaq qızın da fikri önəmlidir. Qardaşım öz nüfuzunu önə çəkib, təkcə özünü düşünməməlidir. Qətiyyən!