Siçanlar üzərində tədqiqat aparan amerikalı alimlər bu qənaətə gəlib ki, siqaret tüstüsü ürəyin formasını dəyişir və onun yığılma ritmində dəyişiklik yaradır. Amerika bioloqlarının «European Journal of Heart Failure» jurnalında dərc edilmiş məqalədə belə deyilir: “İndiyədək siqaret tüstüsünün əsas komponenti olan nikotinin ürək-damar xəstəliyinin yaranmasında rolu qeyri-müəyyən olaraq qalır. Alimlərin sözlərinə görə, siqaret tüstüsü yalnız nikotindən yox, həm də 4000-dən artıq digər kimyəvi komponentlərdən ibarətdir. Onların rolu hələ də öyrənilməyib.

Çikaqodakı İllinoys Universitetinin alimləri siqaret tüstüsünü siçovulların ürəyində tədqiq edib. Beş həftə ərzində heyvanların bir qismi siqaret tüstüsü ilə qarışdırılmış hava, digər hissəsi adi hava ilə nəfəs alıb. Beş həftədən sonra isə siçovulların bir ürəyi exokardioqrafiya mikroskopiya vasitəsilə tədqiq edilib, eləcə də ürək toxumalarının fermentlərinin tərkibi müəyyənləşdirilib. Məlum olub ki, siqaret tüstüsü ilə nəfəs alan siçanlarda ürəyin sol mədəciyinin forması dəyişib.

Bundan başqa, alimlər fəal formalı ferment səviyyəsinin, eləcə də stresslə mübarizə üçün vacib olan norepinefrin hormonunun artdığını müəyyənləşdiriblər. Alimlərin sözlərinə görə, nikotin və siqaret tüstüsünün digər komponentləri ürəkdə biokimyəvi dəyişikliklər yaradır və nəticədə onun forması dəyişir.