İnsan gözləri daim gözəllik, şəffaflıq və saf bir həyat axtarır. Bu həyatı isə yalnız və yalnız iki məkanda tapaq olar. Sevgililər şəhəri olan Roma və Parisdə.

Ən gözəl sevgilərin yaşandığı məkanlar deyincə, təbii ki, ağlagələn ilk iki şəhər - romantika məkanları Paris və Roma olacaq. Bəzən ağlımızda məhəbbətin ikinci adı mənasını daşıyan bu şəhərlər sevgililərin görüş nöqtəsidir.

Paris cazibənin zirvəsi hesab olunur. Məhz “Sevgi və romantizm” deyəndə ilk olaraq bura yada düşür.

Bir yandan Eyfel qülləsinin cazibəsi, o biri yandan küçələrindən sevgi əsən küləklər iliyinizə qədər işləyə bilər. Hər kəsin özünü tapa biləcəyi Parisin ən gözəl yeri isə Eyfel qülləsinin zirvəsindəki sevgililərin olduğu məkandır. Hündürlükdən bütün şəhərin gözəlliklərini seyr edən, əllərində şampan, dodaqlarında sevgini əbədiləşdirən sözlər pıçıldayan sevənlər...

Əsl duyğusal aləmin qoynunda itib-batan boz rəngli reallıq…Əlbəttə ki, burda insan üçün arzuolunacaq daha nə isə qalmır…Parisdə həm də ləzzətli mətbəx təamlarını dadmaq mümkündür. Səhər yeməyindən şam süfrəsinədək gün boyu maraqlı yemək ənənəsinin şahidi olmaq imkanı da var. Beləcə, əsl romantikanı Paris abu-havasında yaşamaq olar.

Roma isə qonaqlarını tarixin qədimliyinə aparmaqla öz qeyri-adiliyini qoruyub saxlayır.

Roma da İstanbul kimi yeddi təpə üzərində yüksəlir. Parisin əkiz qardaşı kimi şöhrətlənən şəhər sevgililər üçün əvəzedilməz məkandır. Aşiqləri daha çox sevgi hekayətləri ilə bağlı olan yerlər maraqlandırır. Bu məqamda Romadakı “Eşq” bulağından bəhs etmək yerinə düşər. Burada belə bir inanc var, “Eşq” bulağına təşrif buyuran hər kəs sevgilisiylə əl-ələ tutub kürəklərini bulağa tərəf çevirərək arzu tuturlar. Sonra sol çiyinlərinin üstündən bulağa qəpik atıb sevgilərinin əbədiliyinə möhür vururlar. Dünya mətbəxindən danışarkən İtaliya yeməklərinin xüsusi vurğulanması isə əsl ləzzəti dadmağın mümkünlüyündən xəbər verir.