Kriminal dünyanın ilk normativ sənədinin müəllifi bakılı avtoritet Ağakərim olubBu günlərdə Bakıdakı 1 saylı Cəzaçəkmə Müəssisəsində saxlanılan “kriminal avtoritet” Yunus Nəzərovun məhbus yoldaşı tərəfindən baltalanması barədə xəbər yayıldı. Bu xəbər, bütün cəmiyyətlərin həmişə maraq obyekti olmuş “avtoritet” mövzusunu yenidən yada saldı. Məlum olur ki, ölkədə istər cəzaçəkmə müəssisələrində, istərsə də azadlıqda onlar hələ də mövcuddur və cəmiyyətin tabe olduğu ümumi, sivil qanunlarla yox, özlərinin yaratdığı “oğru qanunları” ilə yaşayırlar.

Məhkum Y.Nəzərov məhbəsdə öz qanunları ilə yaşayıb və digər məhbusları da bu cür yaşamağa məcbur edirmiş. Hətta qaranlıq dünyanın yazılmamış qanunlarına tabe olmayan digər məhbus yoldaşlarını döyürmüş. Bunun sonu da cinayətlə bitib. Nəzərovun “qanun”larına tabe olmaqdan imtina edən digər məhbus onu yatdığı yerdə baltalayıb. Oğru aləmində bu əməlin özü də birmənalı qəbul edilmir, lakin avtoritet hakimliyinə qarşı çaxan və avtoriteti öldürməyə qəsd edən həmin məhbusun özünün də gələcəkdə avtoritetlərin sırasına qoşulacağı istisna deyil.