Necə bilirsiniz, xoşbəxtlik nədir? Belə baxanda hamımız xoşbəxtliyə can atırıq, onu arzulayırıq. Amma çox az adam tapılar ki, xoşbəxtliyin nə olduğu haqda sadəcə təsəvvürü olsun. Biri sayır ki, lotereyada maşın udmaq böyük xoşbəxtlikdir. O biri hesab edir ki, uğurlu evlənmə də xoşbəxtlikdir. Üçüncü vəzifə pilləsində sürətlə yüksəlir…

Sözsüz ki, ilk baxışda bunların hər birində xoşbəxtliyin müəyyən parametrləri var. Nə hər adama maşın udmaq qismət olur, nə qurulan ailələrin hamısı uğurlu olur, nə də hər avam vəzifə sahibi olub hələ yüksələ də bilir. Bunların hər biri arzulanan, yerinə yetərsə, çox xoş olan məqamlardır. Amma tam xoşbəxtlikdirmi? Bunların hamısı bir yerdə, ya ayrı-ayrılıqda qismətinə düşən adam özünə mən tam xoşbəxtəm deyə bilərmi? Musbət cavab verməyə çətinlik çəkirəm. Amma yox da deyə bilmirəm. Yaxşı, təsəvvür edək ki, bunlar oldu. Və günlərin bir günü…

Budur, maşını uddun və elə ilk reysdə də Allah eləməmiş, düşdün qəzaya. Xoşbəxtliyin bir anda bədbəxtliyə çevrildi. İkincinin arvadı küsüb getdi, boşandı, indi o nəinki xoşbəxtdir, hətta mövcudluğuna da sevinmir. Üçüncünü atdılar bayıra, vəzifədən saldılar. İndi onun «xoşbəxt»liyinə nəinki sevinmirlər, hətta bəzilərinin ona yazığı da gəlir. Belə olanda (belə olmamaqdan isə heç kəs sığortalanmayıb) bəxtinə düşənlərə xoşbəxtlik deyə bidirsənmi?
İşin bu tərəfini götürəndə deyəsən, belə çıxır ki, xoşbəxtlik elə ancaq bəxti gətirmək, qısa müddətli sevinc gətirən uğurdur axı. Bəs indiyəcən bu haqda oxuduqlarımız, arzuladıqlarımız, can atdığımız belə təsadüflər ucbatından bir anda havaya uçacaqsa, nağıla, əfsanəyə dönəcəksə… Bəs bəşəriyyətin əsrlərdir bu müvəqqəti sevincə, ani hissə can atmasına dəyərmi? Əgər o, ancaq bir göz qırpımı, bir andırsa…

Əlbəttə, yuxarıda sadaladıqlarımın hər biri də təsadüf ola bilər. Bu, o demək deyil ki, hər maşın udan qəzaya düşür, hər ailə uğursuz alınır, hər vəzifədə olanı yıxırlar. Dediklərimin tam əksləri də var və kifayət qədər çoxdur. Az qala sevgidə də