Ey nifrət yaradan,canımda mənim
Sənin eşqin gəzir qanımda mənim.
Bir an qalmasan da yanımda mənim
Əbədi qəlbimdə qalıb gedirsən.

Bu fikir,öncədən götür-qoyundu,
Bəlkə düşünülmüş kiçik oyundu.
Bugün mənim yasım,sənin toyundu
“Vağzalı” havasın çalıb gedirsən.

Sən idin tək mənim əlimdə varım,
Sən idin çiçəyim,gülüm,baharım,
Mənsiz kədər dolu həyata,yarım
Mənli xəyallara dalıb gedirsən.

Kəsərək qılıncla,yararaq oxla,
İstəsən səbrimi yenə də yoxla
Mən sənə qəlbimi verdimki saxla
Sən isə əlindən salıb gedirsən.

Görüşə çağırdın,səsinə yetdim,
Nədənsə inciyib uşaqlıq etdim,
Bir dəfə səhv edib mən çıxıb getdim,
İndi sən intiqam alıb gedirsən...