Qlobal Şəbəkənin aparıcı internet-axtarış serverlərindən biri olan ABŞ-ın “Yahoo! Inc.” şirkətinin təmiz mənfəəti 2011-ci ilin birinci rübündə 28 faiz, gəliri isə 6 faiz azalıb.Rabitə və İnformasiya Texnologiyaları Nazirliyinin rəsmi saytına istinadən verdiyi məlumata görə, yanvar-mart ayları ərzində şirkət 223 milyon dollar və ya bir səhmə görə 17 sent qazana bilib.


Ötən ilin həmin dövründə isə “Yahoo!”nun bu göstəriciləri müvafiq olaraq 310 milyon dollar və 22 sent olub. Bundan əlavə, internet-şirkətin cari ilin birinci rübündə gəliri 1,064 milyard dollara bərabər olub ki, bu da 2010-cu ilin birinci rübündə əldə olunan gəlirdən 66 milyon dollar azdır.


Qeyd edək ki, “Yahoo! Inc.” şirkəti 1994-cü ildə Stenford Universitetinin aspirantları Devid Filo və Cerri Yanq tərəfindən yaradılıb. “Yahoo!” internetin ikinci ən populyar axtarış sistemidir və “Yahoo! Directory” portalında birləşən bir sıra servisləri təqdim edir.