Qaraüzlü balınca baş qoyub
Rəngi qaçmış şəkillərə baxa-baxa
Özümü aldadıb
gülərək,
Özümə yalan danışıb
Öz başımı qataraq
Səni xatırlamaq istəyirəm...
Etibarsızlığını, inamsızlığını,
Yalanlarını unudaraq
Səni yuxumda qonaq etmək istəyirəm.
Bir stəkan soyuq çay içmək,
İşığa qənaət edərək
Ütüsüz köynəklə gəzib
Barmaq uclarımın təmiz hava udduğu
corabları çıxarmamaq.
yenidən aldadılmaq,
top kimi oynadılıb
zibil kimi atılmaq...
yenidən paklaşmaq,
qablaşdırılmaq
və
kuklalığa son qoymaq...
Nə qədər uzun olsa belə
3 almaynan bitən nağıllara qonaq olmaq,
Eyni relslərdən keçən
qatar stansiyalarında yağmura tutulmaq,
Qaçmaq,
Unutmaq,
Qışqırmaq
Və rahatlaşmaq...
Saat tıkkıltısını unutmaq,
Xəyallara dalmaq və boğulmaq...
Üzə bilmədiyimi unutmaq və
Balıq olduğuma aldanmaq.
Aynada özümü tanımamaq,
Özümü utandırmaq istəyirəm...
Pis vərdişlərini,
İçkiyə dadandığını,
Mənə qurşandığını,
Ona aldandığın,
Sigaretə sığındığını,
Allahı dandığını xatırlamaq istəyirəm...
Daha doğrusu unutmaq,
Əzabsız yaşamaq,
Əzabsız gəbərmək istəyirəm..!