Mən vida etməyi bacara bilmərəm. Duyğularımı da üzə vurmaram onsuz da,hələ bu vida daha çətin gəlir mənə. Əslində bu son görüşə ehtiyac yoxdu. Amma insanı ürəyi dözmür. Bilirəm çətin olacaq amma səndən xatırlamağını belə istəmirəm. İkimizin də ürəyinin dərinliyində bu sevgi yalnız təmizliyi və saflığı ilə qalsın.
Nə gözəl başladıq səninlə. İkimizdə gənc idik, coşqunluğumuzun son səhifəsində, qanımızın qaynadığı bir vaxtda gördük bir-birimizi. Gecələr boyu yuxusuz qaldıq bir-birimizi düşünməkdən, ən gözəl həyəcanları, ən gözəl baxışları yaşadıq. Həmin eşqi yaşadıq, zamanı saxlıyıb həyatın gözəl anlarını birgə yaşadıq. İncikliklərin də ən gözəlini biz etdik. Çünki barışmaq da ayrı bir zövq verirdi bizə. Sevdik, sevildik, doğruluğuna vardıq müqəddəs duyğuların. Eşq andları etdik yerinə yetirə bilməyəcəyimizi bilə-bilə. Günlərlə, aylarla yalnız ikimiz var imiş kimi yaşadıq. Öz odumuzda yandıq,ən əhəmiyyətlisi isə bir-birimizi anladıq. Yuxularda belə yalnız ikimiz var idik. Əsl sevgini daddıq bunu səndə bilirsən.
Biz birlikdə olmasaq belə həmin duyğular həmişə eyni qalmalı deyilmi? Gözəl başlayan çox gözəl yaşanan bu eşqi həmin təmiz duyğularla bitirməliyik. İndi də ayrılığın ən gözəlini acısı ilə biz yaşıyırıq. Nə deyirsən bu da Allahın bir lütfü deyilmi bizə? Nə olar ağlama. Sən mənim güclü sevgilim deyilsənmi? Güclü oldun sən həmişə. Səni belə xatırlamaq istəyirəm, sil göz yaşlarını. Onsuz da ağlamaq heç bir şeyə çarə deyil. Artıq havada qaralmağa başladı, zaman yenədə həmişəki kimi bizə qarşı çox qəddardı. Yəqin əvvəlki kimi olmağımızı istəyir. İstəsək də istəməsək də ayrılmalıyıq.
Sənə bir şey demək istəyirəm. Mavi köynəyin sənə çox yaraşır, bir də hansı qızla tanış olmaq istəsən bu sözlərimi unutma. Bir də sonda kiçik bir istəyim geriyə baxma hər şey burda bitsin. Salamat qal....

Bu dünyada əbədilik nə var ki,
Ömür kimi hər şey gəldi-gedərmiş,
Nə sevginin günahı var, nə bizim
Bu sevginin ömrü bura qədərmiş.