Ezamiyyət səfərinə çıxan bir cavan işlərini yekunlaşdırdıqdan sonra şəhərin gözəl otellərindən birində otaq sifariş edir. Otaqda internet şəbəkəsinə qoşulan kompüteri gördükdə kefi kökəlir. Masa arxasına keçib həyat yoldaşına məktub yazır. Lakin hərf səhvi edərək məktubu başqa bir ünvana göndərir.
Həmin gün başqa şəhərdə ortayaşlı bir qadın həyat yoldaşının dəfnindən evinə qayıdır. Qadın e-mail vasitəsilə ona göndərilən məktubu görür. Dostlarının göndərdikləri başsağlığı məktubu olduğunu güman edir. Lakin məktubu oxuduqca həyəcandan və təəccübdən özünü itirir. Səsə gələn yaxınları onun yerə yıxıldığını, monitorda isə belə bir məktub görürlər:

Kimə: Sevgili həyat yoldaşıma.
Mövzu: Yeni yetişdim.

Bilirəm ki, məndən belə xəbər tutacağından çaşqın qalacaqsan. Hətta buna əmin olduğumu da deyə bilərəm. Burada kompüter və yüksəksürətli internet şəbəkəsi var və biz sevdiklərimizə məktub göndərə bilirik. Mən buraya təzəcə yerləşmişəm, adımı da elə bu gün yazdırmışam. Günü sabah sənin də buraya gəlməyin üçün hər şeyi təşkil edəcəyəm. Səninlə görüşümüzün həsrətindəyəm, ümid edirəm ki, buraya səfərin çox rahat olacaq. Səni səbirsizliklə gözləyən ərin.