Hərdən sənin üçün çox darıxıram mələyim. Sanki səni görmüşdüm, mənimləsən illərdi.
Səninlə oynamışdıq, amma indi getmisən, bir gün gəlsən, bunu heç vaxt eləmərsən yaxşı?

Getmərsən yanımdan, məni üzülməkdən, ruhdan düşməkdən qoruyarsan.
Mən səni heç vaxt görməmişəm mələyim, amma səni dünyanın çirkinliklərindən qorumaq üçün sevgimi saxlamışam sənə.

Bu sevgi hələ heç bir insana vermədiyim sevgidir, mənə güc verir, bu sevgi güldürür məni.
Sən hələ yoxsan, amma var olacaqsan. Mənim üçün, sevinc səbəbim olmaq üçün.

Sən mənə verilən ən gözəl sürpriz hədiyyə olacaqsan. Bilirsən niyə sürpriz?
Çünki bilirəm ki, sənin gəlişin mənə sürpriz kimi olacaq, balaca uşaq kimi sevinəcəyəm.

Bir gün: "Baax ana, gör nə qəşəng oldum" deyəcəksən mənə, sənə aşiqəm onsuz da, sən ən gözəlsən, sən ən qəşəngsən.
Varlığın məni ucaldacaq, qadınlığın ən yüksək pilləsinə qaldıracaq şirin mələyim mənim.

Hərdən küsdürəcəksən məni, onda tək bir sözün ürəyimdə parıldayacaq, gözlərimi parıldadacaq. "Ana" sözün!
Sənə əlindən tutub gəzdirməyi öyrədəcəyəm, heç bilirsən necə gözəl mənzərədir bu.

Sənin o balaca laklı dırnaqların, ovcum boyda əllərin, bapbalaca barmaqların.
Səni gözləyirəm mələyim, Allahın ən şirin hədiyyəsini.