Hər anın bir həyat olduğuna inanıram…onun mənasız olduğunu şikayət edənlərə, həyatda məna axtaranlara sual verirəm, nə axtarırsınız? Məna? Məna sizin yaratdığınızdır. Həyatınızın mənalı olduğu an sizin onu mənalı etdiyiniz andır. Hər keçən saniyəni hər keçən anı saniyə-saniyə üst-üstə yığıb ömür düzəldirik, heç özümüzün xəbəri olmadan. Həyat var nə qədər ki, biz onu yaşayırıq. Məhz biz onu yaradırıq. O bizə verilib, o bizimdir, özümüzündür başqa heç kəsin.

O deyir: Mən səninəm, al nə istəyirsən et mənimlə

Hər yerdə xırda həyatlar qoyub gedirik. Mağazaya girib bir şey alıb çıxdığımız zaman, kafedə tək başına ətrafdakı insanlara fikir vermədən öz kofenizi içdiyiniz vaxt o an yaşadığınız həyatı da tərk edib elə orda qoyuruq və unuduruq…Bir kiçik həyat da belə getdi. Saniyə-saniyə yığıb düzəltdiyimiz ömrü parçalayıb, hər tərəfə səpələyirik, istəyəndə onu geri qayıdıb qırıntılarını bir-birinə uyğunlaşdırıb quraşdıra bilməmişik və heç vaxt da bacarmayacağıq..Bizə qalan ancaq həmin anları yada salmaq olur. Bizə verilən hər andan ömrümüzə bir qırıntı da əlavə etdik bir qırıntı qədər uzatdıq. Lakin olan qalan ömrümüzdən də bu anı da qoparıb yaşadıq və onu bu an qədər qısaltdıq..

Anlarla yaşayan, həyatı saniyələrlə dəyərləndirənlər, kiçik şeylərdən xoşbəxtlik tapanlar həqiqətən xoşbəxtdirlər. Kimsə danışanda az bir müddətlik bir evdə yaşayan birisi: burda yaşamıram qısa müddətlik qalıram-deyir…Yaşamır…Nə edir bəs? Hə…Qalır..O həmişə də orada qalacaq və orada yaşadıqları ordan kənara çıxmayacaq. O da özünü və qurduğu “qısa müddəti” orda qoymağa məcburdur..

Ölüm anında isə qısa müddətin heç olmasa 0,0000….1 saniyəsini daha artıq yaşamaq, bu gözəl həyatı 0,0000….1 saniyə daha artıq görmək üçün hər şeyini verməyə hazır olacaq insan. Bu anla hamımız rastlaşacağıq. Və sevgidən başqa heç nəyə ehtiyacamız olmayacaq. Kaş ki, sevdiyimiz insanlar yanımızda olsun..

Mən isə xoşbəxtəm ki, hər kəsin bəzən həyatı boyu təəssüf ki, yaşaya bilmədiyi hissləri mən yaşayıram.