“Tapmaca” bu məfhumu hansı “homo sapienes” fikirləşibsə, onu fəlsəfənin babası hesab etmək olar…..
Əslində insan oğlunun bütün ömrü tapmacaların cavabının tapılması ilə keçir… Əvvəlcə, özünün necə yaranması tapmacası ilə… Atalar və analar isə bu tapmacanın həqiqi cavabını bilsələr belə həmişə bundan qaçırlar… Və bütün uşaqlar elə bilirlər ki, onları ya leylək gətirib ya da mağazadan alıblar… Böyüdükcə minlərlə tapmacanın doğru və yanlış cavabları arasında seçim etməyi öyrənən insan formalaşır. Ya insan olaraq ölür, ya da müdrik insan olaraq. Müdriklik isə dünyadakı tapmacaların yarısının cavabını bilmək, yarısının cavabından isə məharətlə qaça bilməkdir.
Əslində İnsan özü də bir tapmacadır. Allahın yaratdığı bütün məxluqlara verdiyi tapmaca…. Şeytan isə ilk dəfə bu tapmacanın cavabını bilməyib cavabdan qaçmaq istəyən məxluq….
Hətta Allahın özü belə tapmacadır. Heç kəsin cavabını tam tapa bilmədiyi və cavabından tam qaça bilmədiyi tapmaca.
Bəs tapmaca nədir? – İnsanın yaşamının mənası. Əgər insan bu dünyadakı bütün tapmacaların cavabını bilsəydi, yaşamın mənası olmayacaqdı.(c)